Prezıdentke mańyzdy reformalardy iske asyrý úshin xalyqtyń qoldaýy qajet - Baqtııar Máken

NUR-SULTAN. QazAqparat - QR Parlament Májilisiniń depýtaty Baqtııar Máken kezekten tys prezıdenttik saılaýǵa qatysty pikir bildirdi, dep xabarlaıdy QazAqparat tilshisi.

"Zańǵa sáıkes, kelesi prezıdenttik saılaý 2020 jyldyń jeltoqsan aıynda ótýi kerek. Biraq qazirgi Prezıdenttiń ókilettiligi kelesi jyly sáýir aıynda aıaqtalady. Demek, ary qaraı 8 aı boıy elimiz joǵary laýazymdy tulǵasyz qalýy múmkin. Bunyń bári ekonomıkalyq protsesterge keri áserin tıgizedi. Sol sebepti kezekten tys prezıdenttik saılaýdy ótkizý týraly sheshim óte oryndy. Bul - qoǵamǵa qajetti shara. Birinshiden, qoǵamdyq-saıası turaqtylyqty qamtamasyz etýge bolady. Ekinshiden, Prezıdentke mańyzdy reformalardy iske asyrý úshin xalyqtyń qoldaýy qajet. Sol sebepti saılaýdy erterek ótkizgen durys", - dedi B.Máken búgin Qazaqstandaǵy jastar uıymdarynyń arnaıy keńesinde.

Onyń aıtýynsha, Elbasy Nursultan Nazarbaev óz ókilettiligin toqtatý týraly sheshimdi qabyldaǵannan keıin joǵarǵy bılik zańdy jáne beıbit jolmen aýysty. Búkil álem osy oqıǵany qurmetpen qabyldady. Al kezekten tys saılaý - osy protsesterdiń zańdy jalǵasy.

"Qazaqstan Respýblıkasynyń Prezıdenti Qasym-Jomart Kemeluly Toqaevtyń kezekten tys saılaýdy ótkizý týraly sheshimi - óte mańyzdy ári qajetti qadam. Biz Tuńǵysh Prezıdentimizdiń arqasynda táýelsiz qýatty memleketti qurdyq. Qazaqstan xalyqaralyq arenada óziniń laıyqty ornyn ala bildi. Memleket basshysy atap ótkendeı, áleýmettik-ekonomıkalyq maqsat-mindetterdi laıyqty júzege asyrý úshin bizge aldaǵy tusta aıqyndyq qajet. Elbasymyz, Tuńǵysh Prezıdentimiz usynǵan áleýmettik baǵdarlamalaryn oıdaǵydaı sátti ári tıimdi iske asyrý úshin bul jaýapty kezeńnin alar orny erekshe. Sol sebepti Qazaqstannyń barlyq jastaryn el bolashaǵynyń aıqyndaýyna belsendilik tanytýǵa shaqyramyn. Bul - elimiz úshin eń jaýapty ári asa mańyzdy kezeńderdiń biri", - dep atap kórsetti B.Máken.

Aıta keteıik, keshe QR Prezıdenti Qasym-Jomart Toqaev xalyqqa úndeý joldap, kezekten tys prezıdenttik saılaýdy ótkizý týraly málimdegen bolatyn.

Búgin QR Ortalyq saılaý komıssııasy kandıdattardy usyný merzimin jarııalady.

Al saılaýaldy úgit-nasıxat jumystary kelesi aıda bastalady.