Prezıdentke Mańǵystaý oblysyndaǵy ınvestıtsııalyq jobalar tanystyryldy

ASTANA. KAZINFORM — Memleket basshysyna Mańǵystaý oblysyndaǵy ınvestıtsııalyq jobalar tanystyryldy, dep habarlaıdy Aqordanyń baspasóz qyzmeti.

Óńirdegi iri ınvestıtsııalyq jobalar qatarynda Aqtaý qalasyndaǵy qýaty 160 MVt bolatyn bý-gaz qondyrǵysynyń qurylysy, mýltımodaldy logıstıkalyq-avıatsııalyq hab, keme qurastyrý verfi, bekire balyǵyn ósirý jáne ýyldyryq óndirý sharýashylyǵy, «Bozjyra» vızıt ortalyǵyn salý, sondaı-aq ammıak-karbamıd keshenin iske qosý sekildi eleýli jobalar bar.

Qasym-Jomart Toqaevqa byltyr aımaq ekonomıkasyna 1,1 mıllıard dollar kóleminde tikeleı sheteldik ınvestıtsııa tartylǵany jóninde málimet berildi. Quny 36 mıllıard teńge bolatyn 15 ınvestıtsııalyq joba júzege asyrylyp, 530 turaqty jumys orny ashylǵan. 5,7 trıllıon teńgege 55 áleýetti ınvestıtsııalyq jobanyń pýly jasaqtaldy.

Osyǵan deıin Memleket basshysy Qasym-Jomart Toqaevtyń tóraǵalyǵymen Mańǵystaý oblysynyń áleýmettik-ekonomıkalyq damýy jónindegi keńes ótkenin jazdyq.