Prezıdentke Kókshetaýdaǵy «Kók shalǵyn» jobasy tanystyryldy

ASTANA. KAZINFORM – Kókshetaý qalasyndaǵy «Kók shalǵyn» birtutas qoǵamdyq keńistigin qalyptastyrý jobasynyń tujyrymdamasyna sáıkes, Máńgilik alaý, Dańq alleıasy, Táýelsizdik alańy jáne Saǵdıev kóshesi sekildi qalanyń eń kórnekti jerlerin úılesimdi sáýletimen jáne dızaınerlik sheshimderimen erekshelenetin biryńǵaı týrıstik baǵytqa biriktirý kózdelgen.

Kókshetaý qalasynyń ákimi Ánýar Kúmpekeev joba aıasynda aýmaqty kógaldandyrý, sondaı-aq avtomatty sýarý júıesi, qurǵaq sýburqaq, dekoratıvti shamdar men sándi oryndyqtar ornatý jumystary júrgiziletinin aıtty. Qopa kólimen jáne jańa jaǵalaýmen ushtasatyn keńistik qala turǵyndary men qonaqtary úshin qolaıly ortaǵa aınalady. Jalpy aýmaǵy 7,5 gektarǵa jýyq jer abattandyrylyp, jasyl jelek otyrǵyzylmaq.

Prezıdentke «Taza Qazaqstan» jalpyrespýblıkalyq aktsııasy aıasynda Kókshetaýda 7 myńnan astam aǵash otyrǵyzylǵany týraly baıandaldy. Jyl sońyna deıin onyń sany 11 myńǵa jetkiziledi.

Budan keıin Memleket basshysy bıyl maýsym aıynda paıdalanýǵa berilgen jańa jaǵalaýmen tanysty.

Sonymen qatar Aqmola oblysynda renovatsııa baǵdarlamasymen jańa qonysqa kóshken otbasymen áńgimelesti.