Prezıdentke «Qazatomónerkásip» kompanııasynyń toǵyz aıdaǵy qyzmetiniń nátıjesi tanystyryldy

ASTANA. KAZINFORM – Memleket basshysy «Qazatomónerkásip» UAK» AQ basqarma tóraǵasy Meıirjan ıÝsýpovty qabyldady. Bul týraly Aqordanyń baspasóz qyzmeti habarlady.

Prezıdentke kompanııanyń bıylǵy toǵyz aıda atqarǵan qyzmetiniń nátıjesi tanystyryldy.

Meıirjan ıÝsýpov álemdik ýran naryǵyndaǵy qazirgi jaǵdaı, atom energetıkasyn damytý úrdisteri men baǵyttary, sondaı-aq kompanııanyń jahandyq atom ındýstrııasyndaǵy Qazaqstannyń pozıtsııasyn odan ári nyǵaıtý josparlary týraly málimet berdi. Jasandy ıntellekt tehnologııasynyń qarqyndy damýyna jáne data-ortalyqtardyń energııa tutyný kólemi artýyna baılanysty ýranǵa suranys turaqty túrde ósýi múmkin ekenin aıtty.

Buǵan qosa, jańa atom reaktorlaryn jedeldetip salý áserinen álemdik naryqta 2030 jyldan keıin ýran tapshylyǵy sezilýi yqtımal.

«Qazatomónerkásip» geologııalyq barlaý jáne elimizdiń mıneraldyq-shıkizat bazasyn ulǵaıtý jumystaryn júıeli túrde júrgizip jatqanyn baıandady.

Bul Joldaýda belgilengen mindetterdi júzege asyrý aıasynda atqarylyp jatyr. Atap aıtqanda, bıyl eki jańa ýchaskede jumys bastalǵan. Jalpy aýdany myń sharshy shaqyrymnan asatyn alty ýchaskede geologııalyq barlaý júrgizilip jatyr.

Kompanııa sırek kezdesetin metaldardy óndirý, ǵylymı-zertteý qyzmetin jandandyrý, jasandy ıntellekt tehnologııasyn engizý baǵyttaryn damytýdy josparlap otyr.

2025 jyly qyrkúıek aıynda «Qazatomónerkásip» kompanııasynyń naryqtaǵy kapıtalızatsııasy eń joǵary tarıhı mejege jetip, 14 mıllıard dollardan asty. Kompanııa aktsııalarynyń quny IPO-ǵa shyqqaly beri 4,5 eseden asa ósti.

Prezıdent resýrs bazasyn odan ári damytýǵa, halyqaralyq yntymaqtastyqty keńeıtýge, sondaı-aq kompanııanyń áleýmettik mańyzy bar bastamalarǵa belsendi atsalysýyna qatysty birqatar tapsyrma berdi.

«QazAtomÓnerkásip» ulttyq kompanııasy» Slovakııanyń Slovenské elektrárne kompanııasymen atom salasyndaǵy yntymaqtastyq týraly memorandýmǵa qol qoıǵanyn jazǵan bolatynbyz.