Prezıdentke Qatar Memleketiniń negizin qalaǵan sheıh Djasım ben Muhammed ben Tánıdiń qylyshy tabystaldy

DOHA. KAZINFORM – Memlekettiń negizin qalaýshy sheıh Djasım ben Muhammed ben Tánıdiń qylyshy – Qatardyń eń joǵary memlekettik sımvoly. Ony monarhtarǵa, hanzadalarǵa jáne memleketter basshylaryna Qatar Memleketine jáne búkil adamzattyń damýyna qosqan úlesi úshin Ámirdiń ózi tabystaıdy. Bul týraly Aqordanyń baspasóz qyzmeti málimdedi. 

Bul qylysh alǵash ret Saýd Arabııasynyń Koroli Salman ben Abdýlazız Ál Saýdqa tabys etilgen (2016). Keıinirek qylysh Oman Sultany Haısam ben Tarekke (2021) jáne Ispanııa Koroli VI Fılıppke (2022) syıǵa tartyldy.

Bul sımvol – Qatar Memleketiniń negizin qalaýshy sheıh Djasım ben Muhammed ben Tánı (1827-1913) ustaǵan qylyshtyń dálme-dál kóshirmesi. Qyny altynmen (18 karat) aptalǵan, eki jaǵy áshekeılengen. Júzi baǵaly, tot baspaıtyn bolattan quıylǵan, al saby túıe súıeginen jasalyp, agatpen jáne týrmalınmen qaptalǵan.

Eske sala keteıik, buǵan deıin Prezıdent Qasym-Jomart Toqaev Qatarǵa memlekettik saparmen barǵanyn habarlaǵan bolatynbyz. Búgin Memleket basshysy Qatar Ámiriniń «Diwan Amiri» saraıyna baryp, Qatar Ámirimen kelissóz júrgizdi.

Kezdesý barysynda Qatar Memleketiniń Ámirisheıh Támımben Hamad Ál Tánı arasyndaǵy kelissóz qorytyndysy boıynsha birqatar qujatqa qol qoıdy.