Prezıdentke kandıdattardyń ult tilinde sóıleý mánerine, oıyn erkin jetkizýine kóp másele baılanysty - Lıngvıstıkalyq komıssııa hatshysy F. Orazbaeva
ANA. 7 aqpan. QazAqparat /Qanat Mámetqazyuly/ - Prezıdentke kandıdattardyń ult tilinde sóıleý mánerine, oıyn erkin jetkizýine kóp másele baılanysty.
Búgin Ortalyq saılaý komıssııasynda ótken QR Prezıdenttigine kandıdattyń memlekettik tildi erkin meńgergendigin anyqtaý jónindegi lıngvıstıkalyq komıssııanyń alǵashqy otyrysy barysynda atalǵan komıssııanyń hatshysy Faýzııa Orazbaeva osylaı málim etti.
Jıyn barysynda lıngvıstıkalyq komıssııanyń maqsatyna toqtalǵan komıssııa hatshysy Faýzııa Orazbaeva, kandıdattardyń memlekettik tildi erkin meńgerýin anyqtaý rásimderi týraly da aıtyp ótti. «Jalpy, lıngvıstıkalyq komıssııanyń maqsaty - kez kelgen kandıdattyń qazaq tilinde, memlekettik tilde ádebı normamen óziniń oıyn erkin jetkizýin baqylap, tekserý. Degenmen, bunda kandıdattardyń lıngvıstıkalyq bilimi tekserilmeıdi, kommýnıkatıvtik tildik qarym-qatynas deńgeıi tekseriledi. Sondyqtan jazatyn adam ádebı normamen ǵylym túrinde emes, óziniń oıyn óte túsinikti, erkin, qazaqtyń baı tilimen tujyrymdy jetkize bilýi shart. Al taǵy bir synaq boıynsha úsh baspa betinen aspaıtyn mátindi oqý tekseriledi. Bul rette mánerlep oqýy, daýystap oqýy arqyly kandıdattardyń qazaq tilindegi normalardyń meńgergendigin anyqtaýǵa bolady. Rasynda, sóıleý mánerine, onyń saýattylyǵyna kóp másele qatysty», - dedi F. Orazbaeva. Onyń aıtýynsha, Prezıdenttikke árbir kandıdat memlekettik tildi erkin meńgerip qana qoımaı, qazaq tildi aýdıtorııamen qarym-qatynasqa erkin barýy da basty nazarda ustalady.
