Prezıdentke «Halyq qaharmany» ataǵyn bere otyryp, onyń esimimen baılanysty jetistikter úshin búkil halyqty quttyqtaı alamyz - senator Ǵ. Qasymov
ASTANA. 1 jeltoqsan. QazAqparat /Qanat Mámetqazyuly/ - Biz búgin N. Nazarbaevqa «Halyq qaharmany» ataǵyn bere otyryp, onyń esimimen baılanysty jetistikter úshin búkil halyqty quttyqtaı alamyz.
Búgin QR Parlamenti Senatynyń jalpy otyrysynda QR Tuńǵysh Prezıdenti-Elbasy N. Nazarbaevqa «Halyq qaharmany» ataǵyn berýdi qamtamasyz etetin zańdy talqylaý barysynda óz pikirin bildirgen senator Ǵanı Qasymov osylaı málimdedi.
«Qazaqstannyń patrıottar partııasynyń ókili, senator, Memleket basshysynyń senimi bildirilgen adam retinde óz pikirimdi aıtqym keledi. 20 jyl boıy Qazaqstannyń satylap damýynyń arqasynda elimizdiń memlekettik aýmaqtyq táýelsizdigi nyǵaıyp, eldigimizdiń jańa bet-beınesi aıshyqtaldy. Sonymen qatar, BUU-ǵa múshe bola otyryp, bizdiń memlekettigimizdiń tarıhynda tuńǵysh ret halyqaralyq quqyq sýbektisine aınaldyq», - dedi senator Ǵ. Qasymov. Depýtattyń aıtýynsha, táýelsizdiktiń alǵashqy jyldarynda eldigimizge kóptegen qaterler tóndi. Bir ǵana ıadrolyq qarýsyzdaný máselesiniń ózi Qazaqstan basshylyǵynan úlken qaıratshyldyqty talap etti.
«Osy jyldary Prezıdentpen birge eńbek etý men úshin ómirimniń uly sabaqtaryna aınaldy. Sondyqtan da «Halyq qaharmany» ataǵy Elbasyna ábden laıyq dep bilemin. Budan bólek, kóptegen elderdiń kóshbasshylary ózderiniń elindegi eń joǵary ataqtarmen bizdiń Prezıdentti marapattap ta qoıǵan. Sondyqtan da, Prezıdentti álem moıyndaıdy, álemdik saıası arenada Onyń qaıratkerligi moıyndalady. Endeshe, mine búgin osy kún kelip jetti. Biz búgin N. Nazarbaevqa «Halyq qaharmany» ataǵyn bere otyryp, onyń esimimen baılanysty jetistikter úshin búkil halyqty quttyqtaı alamyz», - dedi senator.
