Prezıdentke Almatynyń bıylǵy áleýmettik-ekonomıkalyq damýy jóninde esep berildi
Memleket basshysyna Almatynyń bıylǵy 11 aıdaǵy áleýmettik-ekonomıkalyq damýynyń aldyn ala qorytyndysy jóninde esep berildi, dep habarlaıdy Kazinform Aqordanyń baspasóz qyzmetine silteme jasap.
Erbolat Dosaev atalǵan kezeń ishinde qysqamerzimdi ekonomıkalyq ındıkator 13 paıyzǵa artqany týraly baıandady. Memlekettik bıýdjet túsimderi 4,9 trıllıon teńgege jetip, ósim kórsetkishi 34,5 paıyzdy quraǵan. Qarasha aıynda jyldyq ınflıatsııa 10,5 paıyzǵa deıin báseńdegen. Jalpy, jyl qorytyndysy boıynsha elimizdegi eń iri qala ekonomıkasynyń ósimi 6,5 paıyz deńgeıinde bolady degen boljam jasalyp otyr (2022 j. – 5,0%).
Negizgi kapıtalǵa quıylǵan ınvestıtsııanyń jalpy kólemi 20 paıyzǵa ulǵaıǵany jaıynda aqparat berdi. Jeke ınvestıtsııa 30,3 paıyzǵa artyp, 1,4 trıllıon teńgege jetken. Jyl basynan beri qala ekonomıkasyna barlyǵy 1,53 trıllıon teńge salynǵan.
Almatyda qoǵamdyq kólikti damytý jáne ekologııalyq talaptarǵa sáıkestendirý úshin keshendi jumystar júrgizilip jatqanyn aıtty. Bıyl qalanyń avtobýs parki ekologııalyq taza 1150 jańa avtobýspen tolyqqan. Onyń 550-in jeke tasymaldaýshylar satyp alǵan. Sońǵy 11 jylda alǵash ret trolleıbýs parki de jańartyla bastaǵan. Búginde 100 trolleıbýs satyp alynǵan, qosymsha taǵy 100-in satyp alý arqyly kelesi jyly trolleıbýs parki tolyqtaı jańarady. Jol-kólik ınfraqurylymynyń damýy týraly baıandady. Qalanyń 70 kóshesine 25 shaqyrym jańa jol salynǵan jáne 200 shaqyrym jolǵa ortasha jóndeý jumystary júrgizilgen.
Áleýmettik ınfraqurylymdy jańǵyrtýǵa qatysty málimet berdi. Densaýlyq saqtaý salasynda medıtsınalyq-sanıtarııalyq alǵashqy kómektiń (MSAK) jańa biryńǵaı standarty belsendi túrde engizilýde.
Almatyda «Jaıly mektep» ulttyq jobasy aıasynda 37,1 myń oryndyq 22 mekteptiń qurylysy men jobalaý jumystary bastalǵan. Jyl basynan beri NEET sanatyndaǵy 36,7 myń azamat jumysqa ornalastyrylǵany jóninde aıtty. Onyń 82 paıyzy – turaqty jumys orny. Qajetti mamandyqtardy oqytýdyń qysqamerzimdi kýrstary jáne Jobfair365 bos jumys oryndarynyń tsıfrlyq platformasy iske qosylǵan. Jastar úshin 8 komıýnıtı-ortalyǵy ashylǵan.
Prezıdenttiń qalany kógaldandyrý jónindegi tapsyrmasynyń oryndalý barysy erekshe baqylaýda ekenin jetkizdi. Jyl basynan beri 276 myń túp kóshet otyrǵyzylǵan. Jyl sońyna deıin olardyń sany 320 myńǵa jetkizilmek. Almatydaǵy saıabaqtar aýmaǵy 397 gektarǵa ulǵaıǵan.
Qasym-Jomart Toqaev megapolıs ekonomıkasyn odan ári ártaraptandyrý, ınvestıtsııa tartý, shaǵyn jáne orta bıznesti qoldaý sharalaryn kúsheıtý jóninde naqty tapsyrmalar berdi. Sondaı-aq ákimge qoǵamdyq kólikti ekologııalyq talaptarǵa sáıkestendirý jáne Almatynyń kólik qatynastary júıesin damytý mindetin júktedi.
