Prezıdentke Aqmola oblysynyń 6 aıdaǵy damýy týraly baıandaldy
ASTANA. KAZINFORM - Memleket basshysy Aqmola oblysynyń ákimi Marat Ahmetjanovty qabyldady. Prezıdentke óńirdiń bıylǵy birinshi jartyjyldyqtaǵy áleýmettik-ekonomıkalyq damýynyń qorytyndylary týraly esep berildi.
Marat Ahmetjanovtyń aıtýynsha, óńdeý ónerkásibinde, aýyl sharýashylyǵynyń jalpy ónim kóleminde, kólik qyzmeti men baılanys salasynda oń dınamıka baıqalady. Sonymen qatar oblys ákimi ekonomıkalyq ósimdi qamtamasyz etý úshin qolǵa alynǵan sharalar týraly aıtty.
Agroónerkásip salasynda dándi daqyldardan 5 mıllıon tonnadan astam ónim alý kózdelip otyr. Memlekettik qarjy ınstıtýttarynyń qoldaýymen 7 iri taýarly sút fermasy salynýda. Bıyl óńdeý ónerkásibinde 9 jobany iske qosý josparlanǵan. Jalpy, oblys ekonomıkasyna 179 mıllıard teńgeden astam ınvestıtsııa tartyldy. Óńirdiń ınvestıtsııalyq portfelinde 187 joba bar. Olardyń aıasynda 1,7 myń jumys orny ashylmaq.
Oblys ekonomıkasyn odan ári ártaraptandyrý maqsatynda Arshaly aýdanynda respýblıkalyq mańyzy bar Aqmola ındýstrııalyq aımaǵy quryldy. Áleýetti ınvestorlardy tartý jáne olarǵa «bir tereze» qaǵıdasy boıynsha qoldaý kórsetý úshin elordada Aqmola invest ınvestıtsııalardy damytý ortalyǵy ashyldy.
Prezıdentke sý tasqynynyń saldaryn joıý jáne zardap shekken azamattardy qoldaý sharalarynyń oryndalý barysy jóninde málimet berildi. Búginde 711 úı tolyq jóndeýden ótti. 331 úıdiń qurylysy júrip jatyr, 221 turǵyn úı satyp alynǵan. 1782 otbasyǵa bir rettik kómek berildi. 814 otbasynyń múlkine kelgen zalal óteldi. Jabaı jáne Qylshaqty ózenderiniń arnalary tazartylyp, aınalma kanaldar salynyp jatyr. Sonymen qatar jaǵalaýlardy nyǵaıtý jumystary qolǵa alynǵan.
Qasym-Jomart Toqaevqa jylytý maýsymyna daıyndyq, ınjenerlik ınfraqurylymdy damytý jáne oblys ortalyǵyn abattandyrý týraly baıandaldy. Kókshetaý qalasynyń turǵyn úı qoryn jańǵyrtý jáne jańartý úshin 150 eski úıdi buzý, sondaı-aq 32 kóppáterli úı salý josparlanǵan.
Bıyl 2 myńnan astam otbasynyń baspana jaǵdaıy jaqsarady. Kókshetaý, Stepnogorsk jáne Atbasar qalalarynda jalpy uzyndyǵy 26,4 shaqyrym bolatyn jylý jelisi jóndelip jatyr. Bul jelilerdiń tozý deńgeıin orta eseppen 4,2 paıyz tómendetýge múmkindik beredi. «Jaıly mektep» ulttyq jobasy aıasynda 9 mekteptiń qurylysy aıaqtalady. Onyń tórteýi jańa oqý jyly bastalǵanǵa deıin paıdalanýǵa beriledi. «Aýylda densaýlyq saqtaýdy jańǵyrtý» jobasy boıynsha 43 myń turǵynǵa alǵashqy medıtsınalyq-sanıtarlyq kómek kórsetetin 38 nysannyń qurylysy júrgizilip jatyr.
Kezdesý sońynda Prezıdent Aqmola oblysynyń strategııalyq damý josparyn júzege asyrý jumystaryn jalǵastyrýdy tapsyrdy. Memleket basshysy óńirdiń elimizdegi azyq-túlik qaýipsizdigin qamtamasyz etýde negizgi ról atqaratynyna nazar aýdaryp, agroónerkásip keshenin jańǵyrtý, sonyń ishinde egin jınaý naýqanyn ýaqtyly ári sapaly atqarý mańyzdy ekenin atap ótti.
