Prezıdent jýrnalısterdiń jańa Konstıtýtsııany qabyldaýǵa qosqan úlesin joǵary baǵalady

Prezıdenttiń aıtýynsha, buqaralyq aqparat quraldaryn ulttyń úni, qoǵamnyń aınasy deýge tolyq negiz bar. Óıtkeni óz azamattarymyzben qatar, kúlli álem qaýymdastyǵy elimizde jasalyp jatqan aýqymdy ózgeristerdiń túpki mánin, eń aldymen, otandyq medıa arqyly tanyp, biledi. 

— Bul turǵydan alǵanda, Qazaqstan jýrnalısteri osy jaýapkershilikti tereń sezinip, kásibı mindetterin jemisti atqarýda. Naýryz aıynda biz — bárimiz bir el bolyp, konstıtýtsııalyq reformany tabysty júzege asyrdyq. Jalpyulttyq referendým kezinde halqymyz memlekettiń keleshegin aıqyndaıtyn tarıhı tańdaýyn jasady. Elimizdiń bas qujaty — jańa Konstıtýtsııamyz óz tuǵyryna qondy. Ata zańdy ázirleý jáne qabyldaý ońaı sharýa emes ekeni anyq. Bul — birligi bekem, rýhy bıik jáne jarqyn bolashaqqa degen senimi zor ulttyń ǵana qolynan keletin biregeı qadam. Biz osy maqsatqa jetý úshin uzaq joldy júrip óttik, — dedi Memleket basshysy.

Bıyl arnaıy Konstıtýtsııalyq komıssııa qurylyp, Negizgi zańnyń ár baby el múddesi turǵysynan muqııat saralandy. Prezıdent búkil jurtty bir muratqa uıystyrǵan ortaq iste medıa salasy mamandarynyń mańyzdy ról atqarǵanyn erekshe atap ótti.

— Jýrnalıster qaýymy Konstıtýtsııalyq komıssııanyń qyzmeti týraly sapaly jáne mazmundy habarlar taratty. Sondaı-aq Ata zańǵa engizý úshin usynylǵan túzetýlerge qatysty jan-jaqty taldaý jumysyn júrgizdi. Naýqan kezindegi tikeleı efırler, saraptamalyq materıaldar men tanymdyq suhbattar — sonyń aıqyn dáleli. Jalpy, jýrnalıster óz kásibıligin tolyǵymen kórsetti. Osy salada naǵyz kásibı maman bolý degenimiz — «qoldan jasalǵan» aıqaı-shý nemese dańǵaza jasaý emes, bul — eń aldymen ózekti máseleni jan-jaqty bilý jáne taqyrypty jetik meńgerý degen sóz, — dep tolyqtyrdy Q. Toqaev.

Komıssııa otyrysynyń áleýmettik jelidegi efırleri de mıllıonnan astam qaralym jınady. Osylaısha, Ata zań jobasyn talqylaý jalpyulttyq deńgeıdegi pikirtalasqa ulasty.

— Bul iske elge janashyr azamattarymyz túgel qatysty. Máselen, «e-Government» jáne «e-Ótinish» tsıfrlyq júıesi arqyly myńdaǵan ótinish kelip tústi. Túptep kelgende, munyń bári «Halyq únine qulaq asatyn memleket» tujyrymdamasynyń naqty kórinisi ekeni sózsiz. Konstıtýtsııalyq komıssııa músheleri salmaqty ári utymdy usynystardyń eshqaısysyn nazardan tys qaldyrǵan joq, onyń bári muqııat zerdelendi. Bas qujattyń jobasyn daıyndaý jáne ony talqylaý tájirıbesi memleket pen azamattardyń qarym-qatynasyn múldem jańa deńgeıge kóterdi. Komıssııa quramynda mass-medıanyń bedeldi ókilderi de boldy. Sondyqtan jýrnalıster qaýymyn jańa Ata zańymyzdyń teń avtorlarynyń biri dep aıtsaq, qate bolmaıdy, — dedi Prezıdent.

Aıta keteıik, 28 maýsym — BAQ ókilderiniń kásibı merekesi qarsańynda Memleket basshysy Qasym-Jomart Toqaev jýrnalıster qaýymyn quttyqtady.

Eske sala ketsek, 2019 jyly Prezıdent Qasym-Jomart Toqaev jýrnalısterdiń kásibı merekesin bekitý jóninde Úkimetke tapsyrma bergen bolatyn. Úkimettiń tıisti Qaýlysy jarııalanyp, 28 maýsym kúni Buqaralyq aqparat quraldary qyzmetkerleriniń merekesi atalyp ótetin boldy.