Prezıdent: Júrgizýshi kýáligin oqymaı-aq alatyndar bar
ASTANA. KAZINFORM – Memleket basshysy Qasym-Jomart Toqaev «Ádiletti Qazaqstan: zań men tártip, ekonomıkalyq ósim, qoǵamdyq optımızm» atty Joldaýynda júrgizýshilerdi daıarlaý deńgeıiniń de tómendep ketkenin aıtty.
«Jol apattary qoǵamnyń zor alańdaýshylyǵyn týǵyzyp otyr. Jyl basynan beri jol-kólik oqıǵasynan 1300-den astam adam qaza bolyp, 16 myńnan astam azamat zardap shekti. Adamdar kún saıyn jol ústinde qazaǵa ushyrap jatyr. Olardyń arasynda tutas otbasylar da bar...
Júrgizýshilerdi daıarlaý deńgeıiniń de tómendep ketkeni jasyryn emes. Júrgizýshi kýáligin arnaıy oqymaı-aq alatyn jaıttar bar. Úkimet, ákimder, Іshki ister mınıstrligi batyl qadam jasaýy kerek. Depýtattar bul máseleni nazarda ustaýǵa tıis», - dedi Prezıdent.
Qasym-Jomart Toqaev ásker qatarynda zań men tártiptiń saqtalýyna da toqtaldy.
«Jastar áskerge Otan aldyndaǵy boryshyn óteýge barady. Jas sarbazdarymyz óz mindetin alańsyz oryndaýy úshin ásker qatarynda, eń aldymen, temirdeı tártip bolýǵa tıis. Qarýly kúshter men basqa da kúshtik qurylymdar osy talapty múltiksiz oryndaýy qajet.
Ár ata-ana áskerge ketken balasyn memleketke senip tapsyrady. Sondyqtan sarbazdardyń densaýlyǵy men qaýipsizdigine, eń aldymen, armııa basshylyǵy jáne quqyq qorǵaý mekemeleriniń basshylary jaýapty», - dedi Memleket basshysy.
