Prezıdent «Jumyspen qamtýdyń jol kartasy» baǵdarlamasyn uzartýdy tapsyrdy

NUR-SULTAN. QazAqparat - Qasym-Jomart Toqaev Úkimet pen Ulttyq bankke 2021 jylǵa arnalǵan «Jumyspen qamtýdyń jol kartasy» baǵdarlamasyn uzartýdy tapsyrdy, dep habarlaıdy QazAqparat Aqordaǵa silteme jasap.

Jańartylǵan baǵdarlamada birinshi kezeńdi iske asyrý barysynda anyqtalǵan kemshilikterdi eskerý qajet.

«Bul jerde óńirlerge bólinetin qarajattardy sapaly ári tıimdi bólý jóninde sóz bolyp otyr. Tikeleı maǵynasynda aqshany jelge ushyrýǵa nemese «óz» kompanııalaryna kelisimsharttardy bólip berýge jol berilmeýi tıis. Qarajattardyń bir bóligin mıkro nesıe berýge jumsaýǵa bolady. Úkimet pen Ulttyq bank 1 jeltoqsanǵa deıin naqty usynystar berýi tıis. Ulttyq palata daǵdarysqa qarsy sharalardy ázirleý men olardy iske asyrýda birshama qoldaý kórsetkenin atap ótkim keledi. Medıtsına tilimen aıtsaq, biz birlese otyryp problemaǵa durys dıagnoz qoıyp, emdeýdiń qajetti sharalaryn qabyldaı aldyq», - dedi Prezıdent.

Prezıdenttiń tapsyrmasy boıynsha sapaly jańa retteýshilik júıe ázirlene bastady. Qoldanystaǵy barlyq baqylaý-qadaǵalaý, ruqsat berý jáne basqa da retteýshi quraldarǵa úlken ári naqty tekserýler jasalady.

Eske sala ketsek, Memleket basshysy «Atameken» ulttyq kásipkerler palatasynyń VII sezine qatysty.