Prezıdent «Jumysshy mamandyqtarynyń qalasy» festıvaline bardy
ASTANA. KAZINFORM — EXPO kórme alańynda bolashaq mamandardyń, jumys berýshiler men kásiptik-tehnıkalyq uıymdardyń basyn qosqan «Jumysshy mamandyqtarynyń qalasy» festıvali ótip jatyr, dep habarlaıdy Aqordanyń baspasóz qyzmeti.
Bul — Memleket basshysy Qasym-Jomart Toqaevtyń bastamasymen jarııalanǵan «Jumysshy mamandyqtary jylyndaǵy» alǵashqy aýqymdy is-shara.
Festıval Oqý-aǵartý mınıstrliginiń uıymdastyrýymen jáne basqa da salalyq vedomstvolardyń, ulttyq kompanııalar men iri kásiporyndardyń qoldaýymen ótip jatyr.
Qalashyqtaǵy 40 ınteraktıvti kórmede 200-den astam mamandyqtyń qyr-syryna qanyǵyp, ekonomıka sektorlarynyń erekshelikterimen tanysýǵa bolady.
Festıval aıasynda birneshe kún boıy túrli semınarlar, sheberlik saǵattary, ınnovatsııalyq sessııalar men jumys jármeńkeleri uıymdastyrylady.
Alǵashqy eki kúnde is-sharaǵa 15 myńnan astam adam kelgen.
Qasym-Jomart Toqaev energetıka, taý-ken, metallýrgııa, munaı-gaz, qurylys, aýyl sharýashylyǵy jáne taǵy da basqa salalarǵa maman daıarlaý úderisimen tanysty.
Sondaı-aq Prezıdentke eńbek naryǵyndaǵy suranysqa jáne ár óńirdiń ereksheligine qaraı kásiptik-tehnıkalyq bilim berý uıymdaryn transformatsııalaý mysaldary baıandaldy.
Prezıdent atom elektr stansasy sekildi iri jobalardy júzege asyrý qarsańynda sapaly bilim men kásibı daǵdyny meńgergen mamandar óte qajet ekenin aıtty.
Memleket basshysy «Jumysshy mamandyqtarynyń qalasyn» aralap kórgen soń óńirlerden kelgen jastarmen júzdesti.
Prezıdent kez kelgen eńbek qadirli, qurmetke laıyq ekenine nazar aýdaryp, jastardy aıanbaı eńbek etýge shaqyrdy.
Eske salsaq, budan buryn 11 aqpanda elordada jumysshy mamandyqtarynyń festıvali bastalǵanyn jazdyq.