Prezıdent júldesi úshin báıge jarysynyń jeńimpazdary anyqtaldy
ASTANA. QazAqparat - Elordanyń «Qazanat» ıppodromynda QR Prezıdentiniń júldesi úshin báıge jarystary aıaqtaldy, dep habarlaıdy Astana qalasy ákimdiginiń medıa ortalyǵy.
Shara Atyraý oblysynyń kúnderi jáne EKSPO-2017 kórmesiniń ótýine baılanysty uıymdastyryldy. Shabandozdar báıgeniń úsh túri boıynsha jarysqa tústi: jorǵa jarys, qunan báıge jáne alaman báıge.
At jarysyna Qazaqstannyń barlyq aımaqtarynan 50-ge jýyq shabandoz qatysty. Báıgeniń júlde qory da qomaqty - 51 mln.teńge. Bul syılyqty 5 orynǵa deıin at ıeleri ózara bólisti.
Aqshalaı júldeden bólek, jeńimpazdarǵa Atyraý oblysynyń ákimdigi men uıymdastyrý komıtetiniń arnaıy syılyǵy tabystaldy. Sondaı-aq, jamby atý, qyz qýý, sadaq atý sekildi ulttyq oıyndardan kórinis kórsetilip, aýqymdy mádenı-oıyn-saýyq baǵdarlamasy usynyldy.
Alaman báıgede almatylyq Dııas Jumashtyń tulpary 21 shaqyrymdy súrinbeı baǵyndyryp, top jardy. Birinshi oryn úshin oǵan uıymdastyrýshylar 13 mln.teńgeniń sertıfıkatyn tabystady.
Qunan báıgede (7 shaqyrym) márege Dilmuhamed Jolaýshynyń arǵymaǵy birinshi kelip, 7 mıllıon teńgeni qanjyǵalady.
Jorǵalar ishinde (5 shaqyrym) Aıhan Tólegenovtiń aty shashasyna shań juqtyrmady. Oǵan 3 mıllıon teńge tabystaldy.
«Biz úshin bul úlken jeńis. Osyǵan jetý úshin kóp daıyndaldyq. Biraq búgin barlyǵy oıdaǵydaı bolyp, armanym oryndaldy. Meniń týǵandaryma, ákeme alǵysym sheksiz», - dep alaman báıge jeńimpazy Dııas Jumash óziniń qýanyshymen elorda ákimdiginiń medıa ortalyq tilshilerimen bólisti.
Qatysýshylardy jeńisimen Astana qalasynyń ákimi Áset Isekeshev, Atyraý oblysynyń ákimi Nurlan Noǵaev, Mádenıet jáne sport mınıstri Arystanbek Muhamedıuly jáne Aqparat jáne kommýnıkatsııalar mınıstri Dáýren Abaev quttyqtady.
