Prezıdent júldesi úshin 35 balýan beldesetin boldy

ASTANA. QazAqparat- 1 shilde kúni Astanadaǵy «Barys Arena» muz saraıynda Qazaqstan Respýblıkasy Tuńǵysh Prezıdentiniń júldesi úshin, elordanyń 20 jyldyǵyna arnalǵan qazaq kúresinen «Qazaqstan Barysy» respýblıkalyq týrnıri ótedi, dep habarlaıdy Astana ákimdiginiń resmı saıty.

Osymen segizinshi ret ótetin básekege elimizdiń 14 oblysynan, Almaty men Astana qalalarynan, áskerıler arasynda irikteýden ótken, 35 úzdik balýan qatysady.

Jarysqa qatysýshy balýandar Astanaǵa 28 maýsymda keledi dep kútilýde. Al, 29 maýsymdaǵy saǵat 19:30-ǵa resmı salmaq ólsheý rásimi belgilenip otyr.

1 shildede 12:00-de «Qazaqstan Barysy» týrnıriniń balýandardyń jerebe tartý rásimi bastalmaq. Tartysty beldesýler jeti saǵatqa sozylady dep josparlanǵan. Shara aıasynda sporttyq saıystarmen qatar kontserttik baǵdarlama men keremet shoý ótedi dep kútilýde.

«Qazaqstan Barysy» týrnıriniń bıylǵy júlde qory da qomaqty. Jeńimpaz atanǵan balýanǵa altyn belbeý men altynnan quıylǵan «taıtuıaq» tabystalady. Ekinshi jáne úshinshi oryn ıegerleri sáıkesinshe kúmis jáne qola belbeýlermen marapattalady.

Sonymen qatar, ár beldesýdegi jeńiske - 100 000 teńge, ІІІ orynǵa - 1 800 000 teńge (bapkerine - 900 000 teńge), ІІ orynǵa - 5 500 000 teńge (bapkerine - 1 800 000 teńge), І orynǵa - 25 000 000 teńge (bapkerine - 3 500 000 teńge) beriledi.

Munymen qosa, jyldaǵy dástúrge saı jankúıerler arasynda sý jańa Renault Logan avtokóligi oınatylady. Bıletterdi qazirdiń ózinde «Meloman» dúkenderi jelisi men kassir.kz saıtynan satyp alýǵa bolady. Baǵasy 500 teńge men 5000 teńgeniń aralyǵynda.

Aıta keteıik, jekpe-jekter «Qazaqstan» ulttyq arnasy jáne «Qazsport» telearnasynan, sonymen qatar Reseıdiń «Match! Planeta» jáne «Boks TV», Túrkııanyń «TRT Avaz» telearnasynan tikeleı efırde kórsetiledi.