Prezıdent: Joshy ulysy alǵashqylardyń biri bolyp jahandyq naryq qalyptastyrdy
ASTANA. KAZINFORM – Altyn Orda dáýirinde qala turǵyndarynyń turmysyn jaqsartý úshin ozyq ınjenerlik tásilder qoldanyldy. Bul týraly elordadaǵy Táýelsizdik saraıynda ótip jatqan «Altyn Orda — dala órkenıetiniń úlgisi: tarıh, arheologııa, mádenıet, biregeılik» atty Halyqaralyq sımpozıýmda Memleket basshysy Qasym-Jomart Toqaev aıtty.
- Altyn Orda sol kezeńdegi kóptegen memleketke qaraǵanda óz damýynda strategııalyq ashyqtyq qaǵıdatyna berik boldy. Bul ustanym qalalardyń turpatynan da anyq baıqaldy. Sebebi ulys gúldenip turǵan zamanda qalalardy bıik qamalmen qorshap, tuıyqtaý bolǵan joq. Ár qala qarqyndy saýda ortalyǵy retinde adamdardyń erkin qozǵalysyna beıimdelip, damydy. Bul tájirıbe dala men qala arasynda qaqtyǵystar tolastamady degen ańyz áńgimelerdi túbegeıli joqqa shyǵarady. Kerisinshe, osy baılanystar orta ǵasyrdaǵy eń ońtaıly memlekettilik úlgisiniń negizin qalady,- dedi Prezıdent.
Memleket basshysynyń paıymynsha, Altyn Orda dáýirinen qalǵan qalalardyń materıaldyq-mádenı muralary – sonyń aıqyn kórinisi.
- Ǵalymdardyń málimetine sáıkes, alyp ımperııanyń quramynda júzden astam shahar bolǵan. Altyn Orda dáýirinde qala turǵyndarynyń turmysyn jaqsartý úshin ozyq ınjenerlik tásilder qoldanyldy. Muny túrli arheologııalyq qazba jumystarynan anyq baıqaýǵa bolady. Sol zamandaǵy óndiris pen qurylystyń qarqyndy damyǵanyn Altyn Ordada jasalǵan kirpishterdiń Ertis pen Dýnaı aralyǵynda keńinen qoldanylǵanynan ańǵarýǵa bolady. Eýrazııanyń túkpir-túkpirindegi isker adamdardyń saýda jasaýyna, kásippen erkin aınalysýyna qolaıly jaǵdaı jasaldy. Osylaısha, Joshy ulysy alǵashqylardyń biri bolyp jahandyq naryq qalyptastyrdy. Sol arqyly búkil aımaqtyń ósip-órkendeýine jol ashty,- dedi Qasym-Jomart Toqaev.
Memleket basshysy Altyn Orda sol kezeńdegi kóptegen memleketterge qaraǵanda óz damýynda strategııalyq ashyqtyq qaǵıdatyna berik bolǵanyna nazar aýdartty.
