Prezıdent Joldaýynda qazaq tiliniń aıasyn keńeıtetin joldy atady
Qazaqstan Jazýshylar odaǵynyń tóraǵasy, aqyn Ulyqbek Esdáýlet osyndaı pikir bildirdi, dep habarlaıdy QazAqparat tilshisi.
Aqynnyń aıtýynsha, memlekettik tildi ultaralyq tilge aınaldyrý týraly usynys qazaq tiliniń tynysyn keńeıtpek.
«Joldaýdaǵy taǵy bir kókeıge qonǵan másele – memlekettik til máselesi. «Qazaq tili ultaralyq tilge aınalý kerek», - dedi. Buryn-sońdy memleket basshysynyń deńgeıinde mundaı sóz aıtylmaǵan edi. Osy sóz qazaq tiline, ony ana tili sanaıtyn bizge úlken múmkindik týǵyzyp otyr. Memlekettik tilimizdiń qoldaný aıasyn keńeıtý úshin kúresemiz dep júrmiz ǵoı. Endeshe, ony ultaralyq tilge aınaldyryńdar dep, qolaı týǵyzyp otyr. Bul jerde Prezıdent jón siltedi. Al ony iske asyrý tetikteri tilderdi damytýǵa, memlekettik emes uıymdarǵa bólinetin qarjy esebinen iske asýy tıis. Solardyń aıasynda jaqsy jobalar jasap, qazaq tilin shyn máninde ultaralyq tilge aınaldyrý múmkindigi berilip otyr. Sony durys paıdalaný kerek, - dedi Jazýshylar odaǵyny basshysy.
Eske salsaq, Memleket basshysy Qasym-Jomart Toqaev óz Joldaýynda qazaq tiliniń ultaralyq qatynas tiline aınalatyn kezeńi kelgenin aıtqan bolatyn.
