Prezıdent Joldaýynda qandaı áleýmettik bastamalar aıtyldy – sarapshy
«Bıyl 1 qyrkúıekte Qasym-Jomart Toqaev Parlamenttiń qos palatasynyń birlesken otyrysynda Qazaqstan halqyna jyl saıynǵy Joldaýyn jarııalady. Bul Joldaýdyń ereksheligi – onyń áleýmettik baǵytta bolýy. Memleket basshysy Qazaqstan azamattarynyń edáýir bóliginiń ómirine áser etetin birqatar bastamalardy atap ótti. Birinshi bastama aıasynda eń tómengi jalaqy mólsherin 42500 teńgeden 60000 teńgege deıin ulǵaıtý usynyldy. Eń tómengi jalaqy — kez kelgen jumys isteıtin qazaqstandyqqa memleket tarapynan áleýmettik kepil. Sonymen qatar, memleket tarapynan eńbekaqy tóleýdiń tómengi deńgeıin belgileý jáne barlyq jumys berýshilerdiń bul talapty oryndaýyn baqylaý eńbekaqy tóleýdiń konstıtýtsııalyq quqyǵyn qorǵaýǵa arnalǵan. Eń tómengi jalaqynyń ósýi Qazaqstannyń ishki tutyný kólemin ulǵaıtady jáne JІÓ ósýine yqpal etedi», - dedi S. Ahmetjarov.
Ekinshi jáne úshinshi bastamalar aıasynda Memleket basshysy bıznesti óz qyzmetkerleriniń jalaqysyn ósirýge yntalandyrýdyń «utymdy» sharalaryn ázirleýdi jáne bızneske jıyntyq júktemeni 34%-dan 25%-ǵa deıin tómendetip, eńbekaqy tóleý qorynan biryńǵaı tólem engizýdi tapsyrdy.
«Qazirgi ýaqytta qazaqstandyq bıznes óz qyzmetkerleri úshin aı saıyn bes tólem tóleýge mindetti, olar árbir jalaqynyń 34%-yn quraıdy. Atap aıtqanda, tólemder tizimine jeke tabys salyǵy, zeınetaqy jarnasy, áleýmettik salyq, Memlekettik áleýmettik saqtandyrý qoryna jarna, áleýmettik medıtsınalyq saqtandyrý qoryna aýdarymdar kiredi. Óz kezeginde QR Prezıdentiniń eńbekaqy tóleý qorynan júktemeni azaıtý jónindegi usynysy jumys berýshilerdiń «kóleńkeden shyǵýyna» yqpal etetin bolady. Sonymen birge, barlyq tólemderdi biryńǵaı tólemge biriktirý qajetti aýdarymdardy júzege asyrý mindetin aıtarlyqtaı jeńildetedi», - deıdi sarapshy.
Al tórtinshi bastama aıasynda Memleket basshysy azamattyq qyzmetshilerdiń jalaqysyn júıeli túrde arttyrýdy tapsyrdy. Qazaqstanda barlyǵy 1,2 mln-ǵa jýyq azamattyq qyzmetshi bar. Onyń ishinde 600 myńy – pedagogtar, dárigerler, áleýmettik qyzmetkerler sanaty. Taǵy 600 myńǵa jýyq adam – osy ýaqytqa deıin jalaqysy kóterilmegen barlyq qyzmet salalaryna ortaq jumysshylar.
«Aıta keteıik, jol kartasyn júzege asyrý aıasynda búginde pedagogtardyń ortasha aılyq jalaqysy 234 myń teńgege, dárigerlerdiki 320 myń teńgege, áleýmettik qyzmetkerlerdiki 180 myń teńgege, memlekettik qyzmetshilerdiki 267 myń teńgege jetti. Endi Prezıdent tapsyrmasyna sáıkes, jalaqyny kóterý mádenıet salasynyń qyzmetkerlerine, muraǵatshylarǵa, kitaphanashylarǵa, tehnıkalyq qyzmetkerlerge, qoryqshylarǵa, júrgizýshilerge jáne basqalarǵa da qatysty bolady. Osy sanattaǵy qyzmetkerler jalaqysynyń 2022 jyldan 2025 jylǵa deıin 20%-ǵa ósýi olardyń qarjylyq jaǵdaıyn jaqsartýǵa múmkindik beredi», - dedi QSZI ókili.
Sonymen birge, besinshi bastama aıasynda Memleket basshysy turǵyn úı satyp alý boıynsha halyqqa jeńil nusqalar berý jumystaryn jalǵastyrýdy tapsyrdy. Atap aıtqanda, halyqtyń turǵyn úı máselesin sheshý úshin kredıt berý baǵdarlamasyn kúsheıtý júrgiziledi.
Sarapshynyń aıtýynsha, «Otbasy banktiń» jınaq mehanızmderi azamattardy turǵyn úı nesıesin alý úshin depozıtke únemi jarnalar aýdarýǵa yntalandyrady. «Otbasy bank» júıesi arqyly turǵyn úı nesıesin berý turǵyndarǵa aldyn ala josparlaý mádenıetin qalyptastyrýǵa múmkindik beredi.
«Jalpy, Memleket basshysynyń Joldaýynda aıtylǵan bastamalaryn iske asyrý ekonomıkanyń teńgerimdi ósýin qamtamasyz etýge, adam kapıtalynyń deńgeıin arttyrýǵa, azamattardyń ál-aýqatyn jaqsartýǵa jáne aldaǵy kezeńde Qazaqstannyń júıeli damýy úshin basqa da mańyzdy maqsattarǵa qol jetkizýge múmkindik beredi. Qazirgi ýaqytta el Úkimetiniń aldynda QR Prezıdentiniń Joldaýyn iske asyrý boıynsha egjeı-tegjeıli is-qımyl josparyn ázirleý mindeti tur. Óz kezeginde, Parlament pen máslıhat depýtattary jáne jurtshylyq Joldaý tarmaqtarynyń oryndalýyn baqylaýy qajet», - dedi S. Ahmetjarov.
