Prezıdent Joldaýyn jańa saıası maýsymda jarııalaý dástúrge aınaldy – sarapshy
«QR Prezıdenti Qasym-Jomart Toqaevtyń kezekti Qazaqstan halqyna Joldaýy QR Parlamenti sessııasynyń jańa maýsymynyń ashylýynda jarııalanýy dástúrge aınalyp otyr. Bul óz kezeginde jańa saıası maýsymdy jańa mindetter kútip turǵanyn, olardyń júzege asyrylýyna bıliktiń barlyq tarmaqtary jaýapty ekenin ańǵartady jáne halyqtyń ortalyq memlekettik organdar jumysyn baǵalaýy kóp jaǵdaıda Joldaýdaǵy tapsyrmalardyń tıisti deńgeıde oryndalýymen tikeleı baılanysty. Bıylǵy Joldaýdyń basty ózegi byltyrdan beri órshýin toqtatpaı turǵan pandemııadan keıingi ekonomıkalyq damý, halyqtyń ál-aýqatyn ary qaraı da jaqsartý boldy, jańa jaǵdaıdaǵy Qazaqstannyń is-qımyldaryna jan-jaqty kóńil bólinip, damýdyń bir-birimen tyǵyz baılanystaǵy basym baǵyttary usynyldy», - deıdi sarapshy.
Onyń aıtýynsha, Memleket basshysynyń elimizdiń strategııalyq maqsaty retinde Ortalyq Azııa aımaǵyndaǵy kóshbasshy rólin nyǵaıtý, álemdik ekonomıkada óz ornyn aıqyn bekitý dep atap ótýi – osy baǵyttaǵy táýelsizdiktiń 30 jylynda jetken jetistikterdi odan ári jetildirý, qazirgi jahandyq saıasatta qalyptasqan ahýalǵa ýaqytyly, jedel jáne kásibı túrde toıtarys berý qajettigin kórsetedi.
«Aýǵanstandaǵy jaǵdaı jáne jahandyq shıelenistiń jalpy artýy qorǵanys-ónerkásiptik keshen men áskerı doktrınany qaıta júkteý mindetin qoıdy. Qorǵanys qabiletin nyǵaıtý, tıimdilikti arttyrý, qaterlerge qarsy áreket etý de memlekettik mańyzy bar basymdyqtarǵa aınalýy tıis «, - dedi Q.Toqaev Qazaqstan halqyna jyl saıynǵy Joldaýynda. Osyǵan deıingi Áskerı doktrına 2017 jyly bekitilgen bolatyn. Aýǵanstandaǵy qazirgi ahýal jalpy álemniń, sonyń ishinde qazaqstandyq qoǵamnyń da alańdaýshylyǵyn týdyrýda. Bul elde beıbitshilik pen turaqtylyqtyń ornaýyna Ortalyq Azııa aımaǵyndaǵy elder múddeli. Aıta keterligi, bolyp jatqan oqıǵalar Qazaqstanǵa tikeleı qaýip tóndirmeıdi, biraq, árıne, olar belgili bir táýekelderdi týdyrady. Bul óz kezeginde elimizdiń jaǵdaıdyń kúrdeli sıpatta órbýine daıyn bolýyn talap etedi, Qazaqstannyń jáne aımaqtyń qaýipsizdigine syrtqy syn-qaterlerdi modeldeýdiń ózektiligin baıqatady», - deıdi Á. Nazarbetova.
