Prezıdent Joldaýy Qazaqstannyń adamı kapıtalynyń damýyn jańa deńgeıge kóteredi - A. Eshmuratov
ASTANA. QazAqparat - Búgin Ortalyq kommýnıkatsııalar qyzmetiniń baspasóz máslıhatynda sóz alǵan «Saıasattanýshylar kongresi» QB basqarma tóraǵasy Arman Eshmuratov QR Prezıdentiniń 2015 jyly 30 qarashada jasaǵan Joldaýyna taldaý jasap kórdi.
«Qazaqstan Prezıdentiniń Joldaýy bizdiń elde dástúrge aınaldy jáne eldiń damý baǵytyn anyqtap beretin bul oqıǵany barshamyz kútetinimiz ras. Jahandyq ekonomıkadaǵy asa aýyr kezeńde, Joldaý álemdik qaýip-qaterlerge bergen jaýap boldy», - dedi sarapshy.
Onyń oıynsha, naqty ekonomıkalyq tapsyrmalar men bastamalarǵa qaramastan, Joldaý eldiń áleýmettik qujaty bolyp tabylady.
«Sebebi Joldaýda, barlyq ekonomıkalyq qıyndyqtarǵa qaramastan, eń basty basymdyq adamı kapıtaldyń damýyna salynǵan», - dedi A. Eshmuratov.
Ol sonymen qatar bul sheshimder arqyly Qazaqstan Prezıdenti eldiń damý jolyn aıqyndaý barysynda jańa áleýmettik saıasatqa erekshe mán bergendigin naqtylady.
«Barsha álemde adamdardyń kiristeri tómendegen daǵdarys kezinde Prezıdent 2016 jyldan bastap, jalaqyny bilim berý salasynda - 28 paıyzǵa, densaýlyq saqtaý - 29 paıyzǵa kóterýdi tapsyrdy. Jańa Joldaýda atap kórsetilgenindeı, 2016 jyldyń 1 qańtarynan bastap, zeınetaqy mólsheri ınflıatsııadan 2 paıyzǵa joǵary deńgeıge kóterilmek. Mundaı eshbir elde jasalyp jatqan joq», - dep atap ótti ınstıtýt basshysy.
Aıta keteıik, 2016 jyly áleýmettik ótemaqylar 25 paıyzǵa, «B» korpýsynyń memlekettik qyzmetkerleriniń jalaqysy - 30 paıyzǵa joǵarylatylady. Sondaı-aq 2017 jyly kásibı-tehnıkalyq bilim berý tegin bolady.
«Menińshe, Joldaý Qazaqstannyń adamı kapıtalynyń damýyn jańa deńgeıge kóterip, eldiń áleýmettik jańǵyrtýyna jańa serpin beredi», - dep túıdi sózin sarapshy.
