Prezıdent Joldaýy: Depýtat zeınetaqy jınaǵyn baspanaǵa jumsaý týraly usynysyn aıtty

NUR-SULTAN. QazAqparat - QR Parlamenti Májilisiniń depýtaty Amanjan Jamalov azamattardyń zeınetaqy jınaǵyn bilim alýǵa nemese páter alýǵa jumsaýyna baılanysty pikirin bildirdi, dep habarlaıdy QazAqparat tilshisi.

«Áli kúnge deıin Eńbek jáne áleýmettik qorǵaý mınıstrliginde azamattardyń óz zeınetaqy jınaǵyn páterge nemese bilim alýǵa qalaı jumsaıtyny týraly naqty túsinik joq. Qazir talqylanyp jatqan nusqa tek belgili bir somaǵa qol jetkizgenderge ǵana qatysty. Erler 8,2 mln teńge, áıelder - 10,1 mln teńgeden asatyn qarajat jınaǵanda ǵana zeınetaqy jınaǵyn qoldana alady. Jalpy BJZQ-da bul kórsetkishke qol jetkizgen 90 myń ǵana salymshy bar, bul 1% da tómen kórsetkish. Mundaı sheshim halyqty túńildirýi múmkin. Bul jerde birjaqty sheshim bolmaýy kerek. Sondyqtan, salymshylardyń ár sanaty úshin jetkiliktilik shegi onyń jasyna, tabysyna, yntymaqtyq zeınetaqyǵa quqyǵy, baspanasynyń bolýyna qaraı ártúrli eseptelýi tıis», - dedi depýtat Prezıdenttiń Qazaqstan halqyna Joldaýynyń alǵashqy nátıjeleri týraly ǵylymı-praktıkalyq konferentsııada.

Sonymen birge, depýtat Prezıdent Joldaýynda mańyzdy áleýmettik jáne ekonomıkalyq tapsyrmalardyń berilgenin atap ótti.

«Árbir másele boıynsha halyqtyń kúteri kóp. Qazaqstandyqtar naqty nátıjelerdiń bolǵanyn qalaıdy. Tapsyrmalardy atqarýda formaldy tásilge boı urý qoǵam narazylyǵyn týdyrýy múmkin. Sondyqtan Úkimet óz jumysynyń tıimdiligi men nátıjeli bolýyna kóńil bólgeni jón. Úkimettiń qazirgi quramy Prezıdent bergen tapsyrmalardy oryndaı alatynyna senimdimin», - dedi Amanjan Jamalov.