Prezıdent Joldaýy - bolashaq damýdyń kepili - dotsent A. Jumadil
Bul jospar Qazaqstannyń álemdik daǵdarystyń qashan aıaqtalýyn kútpeı, ózindik damý strategııasyn belgiledi. Bul jaıynda QazUÝ-niń dotsenti Arman Jumadil QazAqparat tilshisine bergen suhbatynda aıtty.
A.Jumadildiń aıtýynsha, QazUÝ-niń tarıh fakýlteti ujymy Elbasynyń barlyq bastamalaryna qoldaý bildire otyryp, onyń Qazaqstan ekonomıkasy men halyqtyń ál-aýqaty máselelerin únemi óziniń erekshe nazarynda ustap otyrǵany tolǵandyrarlyq jaǵdaı ekenin aıtady. Ásirese, úsh munaı óńdeý zaýytynyń memleket qaramaǵyna qaıta ótkenin, halyqty jumyspen qamtý úshin 400 myń jumys ornynyń ashylǵany, elimizdiń ekonomıkasy daǵdarystan keıingi jaǵdaıǵa tez ıkemdeletinine senimderi arta tústi.
«Biz, tarıhshylar qaýymy úshin, bul joldaý - Qazaqstannyń erteńgi kúni tejeýsiz damýynyń kepildigi. Ýaqyt óter, bolashaq urpaq elimizdiń búgingi damý úrdisterine tarıhı turǵydan kóz salady. Sonda, daǵdarys sharpyǵan qıyn jaǵdaıǵa qaramastan Prezıdentimiz N.Á. Nazarbaevtyń tek ekonomıkany ǵana emes, sonymen qatar ǵylym men bilim, densaýlyq saqtaý salalaryn barynsha damytýǵa kóp kóńil bólgendigi erekshe atalatyny sózsiz! Bıylǵy jyly básekege tótep bere alatyn mamandar daıyndaıtyn arnaıy jańadan úsh ýnıversıtettiń ashylýy, olarǵa kórnekti ǵalymdar men oqytýshylardy tartý úshin arnaıy qordyń qurylýy, jańa oqý baǵdarlamalar men oqytýdyń jańa joldarynyń jasalýy - jas urpaqtyń - el bolashaǵyn oılaǵan Elbasymyzdyń kóregendigi! Eń bastysy, bunyń bári iske asýy úshin Elbasy tıisti mekemelerge І-toqsanda onyń zańnamalyq negizi jasalsyn dep naqty tapsyrma berdi», deıdi A. Jumadil.
«Jalpy, Elbasynyń bıylǵy Joldaýy bizge tek úlken senim uıalatyp qana qoımaı, úlken jaýapkershilikti de artty. Al, naryq daǵdarysyna qaramaı bıyl Uly Otan soǵysynyń 65-jyldyǵyna oraı soǵys jáne eńbek maıdanynyń ardagerlerine kórsetken kómegi barlyq qazaqstandyqtardyń kóńilinen shyqty», deıdi dotsent.
