Prezıdent Joldaýy áleýmettik turaqtylyqty saqtaýǵa baǵyttalǵan – depýtat
«Memleket basshysynyń Qazaqstan halqyna Joldaýy halyqtyń ál-aýqatyn arttyrýǵa, áleýmettik turaqtylyqty saqtaýǵa jáne ulttyq ekonomıkany kúsheıtýge baǵyttalǵan. Joldaýdaǵy basymdyqtar men negizgi erejeler «Nur Otan» partııasynyń saılaýaldy baǵdarlamasyn iske asyrýǵa, Elbasynyń strategııalyq bastamalary men Prezıdent tapsyrmalaryna qol jetkizýge baǵyttalǵan. Áleýmettik baǵdarlanǵan memleket – elimizdiń 30 jyldyq damýynyń negizgi kórsetkishi. Bul Joldaýda Qasym-Jomart Toqaev áleýmettik bólimge, densaýlyq saqtaýdy damytýǵa basa kóńil bóldi. Pandemııa jaǵdaıynda bıologııalyq qaýipsizdikti boljaýdyń ulttyq júıesin qurýǵa erekshe nazar aýdaryldy. Qazirdiń ózinde biz zerthanalyq bazany qurý men jetildirýge, bıologııalyq qaýipsizdikti qamtamasyz etý boıynsha materıaldyq-tehnıkalyq jaraqtandyrýǵa baǵyttalatyn bıologııalyq qaýipsizdik týraly zańdy qabyldaıtyn bolamyz. Jalpy alǵanda, bul bıologııalyq qaýipsizdik boıynsha biryńǵaı aqparattyq júıeni qurý, dál osy salada kadrlardy arttyrý jáne daıarlaý», - dedi depýtat tilshilerge bergen suhbatynda.
Sonymen birge, Prezıdent medıtsınalyq jabdyqtar men dári-dármekpen qamtamasyz etýdi saraptaý jónindegi ulttyq ortalyqty qurýǵa erekshe nazar aýdardy.
«Bul azamattarymyzdy sapaly dári-dármekpen qamtamasyz etýge jáne otandyq farmatsııany damytýǵa múmkindik beredi. Búgin Joldaýda dári-dármektiń 18%-y ǵana otandyq óndiris ekeni aıtyldy. Bul kórsetkishti 2022 jylǵa deıin 50%-ǵa kóterý tapsyryldy. Osy sebepten elimizde dári-dármek qymbat, óıtkeni olar shetelden jetkiziledi. Prezıdent Joldaýynda sapaly bilim berýdi qamtamasyz etýge de kóńil bólingen. Memleket basshysy bilim qarqyndy damyp jatqan aqparattyq dáýirde oqý baǵdarlamalaryn da beıimdeý qajettigin atap ótti. Bul úshin árıne, muǵalimder daıyn bolýy kerek. Bizdiń pedagogtardyń biliktiligin arttyrý merzimdiligine erekshe nazar aýdaryldy. Buryn biliktilikti arttyrý bes jylda bir ret ótkizilse, endi ár úsh jyl saıyn biliktilikti arttyrý mindeti qoıyldy», - deıdi J. Nurmanbetova.
