Prezıdent Joldaýy: 4,8 mln qarjylyq qyzmet elektrondy nusqada kórsetilgen

NUR-SULTAN. QazAqparat –Prezıdenttiń baspasóz hatshysy Berik Ýálı Facebook paraqshasynda Prezıdenttiń 2020 jylǵy Joldaýynda aıtylǵan birqatar tapsyrmanyń qalaı oryndalǵany týraly málimet jarııalady, dep habarlaıdy QazAqparat tilshisi.

Memleket basshysy 2020 jylǵy Joldaýynda elektrondy servısterdiń qoldanylý aıasyn keńeıtýdi tapsyrǵan bolatyn.

«Halyqqa elektrondy servısterdi qoldanýdy yńǵaıly etý úshin memlekettik qyzmet kórsetý isinde de, bızneste de bıometrııany keńinen paıdalanǵan jón», - dep jazylǵan Joldaýda.

Berik Ýálı keltirgen derekterge súıensek, 2020 jylǵy 1 qazannan bastap qarjy uıymdarynyń klıentterin qashyqtan bımetrııalyq sáıkestendirý mehanızmi iske qosylǵan. Sodan beri 4,8 mılıonnan astam qarjylyq qyzmet elektrondy nusqada kórsetilgen.

Osynyń arqasynda salada jańa servsıter engizilip, qarjy ınstıtýtyna barmaı-aq, bank shottaryn ashýǵa múmkindik týǵan.

Búginde bank salasynda kez kelgen qarjylyq qyzmet túri elektrondy túrde kórsetiledi. Sonyń ishinde onlaın nesıe naryǵy damyp keledi. Al shalǵaı eldi mekenderdegi turǵyndarǵa kórestiletin qarjylyq qyzmettiń qoljetimdiligi artqan.