Prezıdent Joldaýlarynyń iske asyrylýyn qosymsha parlamenttik baqylaý júıesimen qamtamasyz etý qajet- B. Imashev
TANA. 20 qazan. QazAqparat /Qanat Mámetqazyuly/ - Prezıdent Joldaýlarynyń iske asyrylýyn zańnamalyq deńgeıde tıisti quraldarmen, tetiktermen jáne naqty kepildiktermen bekitý,
olardy qosymsha parlamenttik baqylaý júıesimen qamtamasyz etý qajet. Búgin QR Parlamenti Senatynyń jalpy otyrysynda QR Premer-Mınıstri Kárim Másimovtiń atyna depýtattyq saýal joldaǵan senator Berik Imashev osylaı málimdedi.
Depýtattyń aıtýynsha, Konstıtýtsııanyń 44-baby 1) tarmaqshasyna sáıkes Prezıdent Qazaqstan halqyna eldegi jaǵdaı men respýblıkanyń ishki jáne syrtqy saıasatynyń negizgi baǵyttary týraly jyl saıyn Joldaý arnaıdy. Qazaqstan atynan el ishinde jáne odan tysqary jerlerde ókildik etetin Memleket basshysy naq osy jyl saıynǵy Joldaý arqyly memlekettik bıliktiń birden bir bastaýy jáne konstıtýtsııalyq-quqyqtyq qatynastardyń basty sýbektisi - halyqpen konstıtýtsııalyq-quqyqtyq qarym-qatynas jasaıdy. «Joldaý - bul el damýynyń strategııasyn, memlekettiń ishki jáne syrtqy saıasatynyń negizgi baǵyttaryn, barlyq deńgeıdegi memlekettik bılik organdary qyzmetiniń baǵdarlamasyn, onyń ishinde adam quqyǵy salasyndaǵy baǵdarlamasyn aıqyndaıtyn memlekettik-saıası qujat. Bul rette, onyń normatıvtik-quqyqtyq akti mártebesi bolmasa da, sonymen birge mindetti sıpaty bar. Óıtkeni ol óz máni boıynsha memleket damýynyń aǵymdaǵy jylǵa arnalǵan strategııalyq jospary, taıaý perspektıvaǵa arnalǵan is-qımyl baǵdarlamasy bolyp tabylady», - deıdi senator. Sonymen qatar, B. Imashev Joldaý erejeleri Memlekettik josparlaý júıesiniń qujattaryn túzetý úshin negiz bolyp tabylatynyn, sondaı-aq Prezıdent Joldaýlary Parlamentte jarııa etiletine qaramastan, olardy iske asyrý jónindegi negizgi júktemeni dástúrli túrde Úkimet atqaratynyn atap ótti. «Sonymen qatar, zań shyǵarý jáne joǵary atqarýshy bılik organdarynyń osy strategııalyq qujatty iske asyrý jónindegi is-sharalardy ázirlep shyǵarýdaǵy ózara is-qımyly Memleket basshysy tapsyrmalarynyń oryndalýyn qamtamasyz etý isindegi konstıtýtsııalyq áriptestiktiń mańyzdy aspektisi bolyp tabylady. Іs júzinde eldiń asa mańyzy qujatyn oryndaý zańǵa qosymsha deńgeıde qamtamasyz etiletin bolyp shyǵady. Osyny eskere kele, qazirgi ýaqytta Prezıdent Joldaýlarynyń iske asyrylýyn zańnamalyq deńgeıde tıisti quraldarmen, tetiktermen jáne naqty kepildiktermen bekitý, olardy qosymsha parlamenttik baqylaý júıesimen qamtamasyz etý qajettiligi pisip jetildi dep sanaımyn», - deıdi B. Imashev.
