Prezıdent Joldaýynda Ortalyq Azııaǵa ortaq másele de aıtyldy – Samat Nurtaza

ASTANA. KAZINFORM – Májilis depýtaty Samat Nurtaza Prezıdenttiń Qazaqstan halqyna Joldaýy týraly pikir bildirdi.

«Qazir bári AES máselesine nazar aýdaryp jatyr. Men Joldaýdyń taǵy bir mańyzdy tusyna toqtalǵym keledi. El aýmaǵynyń tek 5 paıyzyn ǵana orman alyp jatqany aıtyldy. ⁠ Prezıdent el aýmaǵynda orman alqabynyń kóp bolǵanyn qalaıtynyn atap ótti. Óıtkeni bul sózderdiń astarynda shóleıttený, Ortalyq Azııada bolady delinip júrgen sý tapshylyǵy máseleleri jatyr dep oılaımyn», - deıdi depýtat.

Májilis ókili óńirler bul iste qaraǵaı men shyrsha egýdi jappaı qolǵa alǵan Abaı oblysynan úlgi alý kerek dep esepteıdi.

Aıta keteıik, Prezıdent búgingi Joldaýynda orman-toǵaıdy kóbeıtý jumystaryna búkil eldi jumyldyrýdy tapsyrǵan bolatyn.

«Memleket aldaǵy ýaqytta da keń baıtaq dalamyzdy jáne ormanymyzdy órtten qorǵaý úshin barlyq qajetti sharany qabyldaıdy. Qazaqstannyń tabıǵaty óte baı jáne alýan túrli. Alaıda orman-toǵaılar jerimizdiń 5 paıyzyn ǵana alyp jatyr. Tabıǵattyń ár alýandyǵyn saqtaý úshin biz orman alqaptaryn kóbeıtýimiz qajet. Bul mindet elimizdiń turaqty áleýmettik-ekonomıkalyq damýy úshin de óte mańyzdy», - dedi Memleket basshysy.