Prezıdent Joldaýynan naqty iske kóshý: Bektenov Úkimettiń mindetterin aıqyndady

ASTANA. KAZINFORM – Prezıdent Joldaýy tarıhı máni zor mindet qoıyp otyr. Ol – óskeleń urpaqtyń ıgiligi úshin qýatty ári ozyq ekonomıkasy bar jańa turpatty memleket quryp, amanat etý. Bul týraly Premer-Mınıstr Oljas Bektenov Úkimet otyrysynda pikir bildirdi.

Úkimet Prezıdent Joldaýyn iske asyrý sharalaryn qarastyrady
Foto: Úkimet

Ol úshin Premer-Mınıstr Prezıdenttiń barlyq aýqymdy reformalary men strategııalyq bastamalaryn tabysty júzege asyrý qajettigin aıtýda.

– Úkimet pen ákimdikter áleýmettik-ekonomıkalyq mańyzy bar nysandardy jáne turǵyn úı-kommýnaldyq ınfraqurylymdy salý men jańǵyrtý úshin qolda bar resýrstardy tıimdi jumyldyrýy kerek. Halyqaralyq jáne ishki logıstıkany damytý, kólik salasyn tsıfrlandyrý, elektr energııasymen qamtamasyz etý máseleleri álemdik aýqymdaǵy ózgerister aıasynda sheshimin tabýǵa tıis, – dedi Úkimet basshysy.

Aýyl sharýashylyǵyndaǵy tehnologııalyq jańǵyrtý men ınnovatsııalar bolashaqta azyq-túlik tapshylyǵynyń aldyn alýǵa kepil bolady.

– Kapıtal tartý salasynda ınvestıtsııalardy basqarýdyń birtutas júıesin ázirleý kerek. Bul ınvestorlardy tartyp, olardy jan-jaqty qoldaý úshin keshendi tásildi qamtamasyz etýge múmkindik beredi. Shaǵyn jáne orta bıznesti damytý, bıýdjet jáne salyq saıasatyn jetildirý, sondaı-aq jalpy Qazaqstannyń tsıfrlyq ekonomıkasyn belsendi damytý uzaq merzimdi kezeńge arnalǵan strategııalyq maqsat-mindetterge qol jetkizýge yqpal etedi, – dep tolyqtyrdy O. Bektenov.

Onyń aıtýynsha, halyqty áleýmettik qamsyzdandyrý júıesindegi jańa tásilder shyn muqtaj jandarǵa kómek kórsetýge múmkindik beredi.

Buǵan deıin Premer-Mınıstr Prezıdent jarııalaǵan «Halyqtyq qurylys» azamattardyń ál-aýqatynyń artýyna serpin beretinin aıtqan edi.