Prezıdent Joldaýyn júzege asyrý: Qazaqstannyń óńdeý ónerkásibi 6,1% ósim kórsetti

ASTANA. KAZINFORM – Memleket basshysynyń qýatty ári ártaraptandyrylǵan ekonomıka qurý boıynsha Joldaýyn júzege asyrý sheńberinde Qazaqstan ónerkásibi qarqyndy ósim kórsetti. Jalpy óndiris kólemi 6,9%-ǵa artty, osy rette negizgi tıimdilik kórsetkishi 6,1%-ǵa ósken óńdeý salasynyń qarqyndy damýy bolyp otyr. Bul shıkizat modelinen qosylǵan quny joǵary ónim shyǵarýǵa josparly kóshýdi kórsetedi. 

Ósý draıverleri – 14% ósim kórsetken mashına jasaý sııaqty basym salalar. Oń dınamıka metallýrgııada (+1,3%), hımııa ónerkásibinde (+6%) jáne qurylys materıaldary óndirisinde (+4,7%) tirkelgen, bul ekonomıkanyń keshendi ındýstrııalandyrýyn kórsetedi.

Ónerkásiptik ósýdi yntalandyrý úshin Úkimet ınvestorlar úshin qolaıly jaǵdaı jasap jatyr. Іri kásiporyndarmen uzaqmerzimdi kelisimsharttar men ofteık-kelisimsharttar kólemi 2 esege ósip, 147 mlrd teńgeden asty. 16 arnaıy ekonomıkalyq jáne 55 ındýstrııalyq aımaq túrindegi ınfraqurylym belsendi damyp keledi. 

– Arnaıy ekonomıkalyq jáne ındýstrııaldy aımaqtar – jańa óndiristerdi júzege asyrýdyń negizgi quraldarynyń biri. Aımaqtar qajetti ınfraqurylymmen qamtamasyz etilgen jáne jobalardy júzege asyrý úshin bızneske beriledi. Óńdeý ónerkásibindegi jańa bastamalardy qoldaý úshin shaǵyn ónerkásiptik aımaqtar qurý quraly iske qosyldy, onda daıyn ónerkásiptik alańdar jeńildikti baǵamen jalǵa beriledi. Mundaı aımaqtar 8 óńirde salynýda, 90-ǵa jýyq jobany iske qosyp, 3 myńnan astam jumys ornyn ashý josparlanyp otyr, - dep atap ótti ónerkásip jáne qurylys vıtse-mınıstri Oljas Saparbekov. 

Osy jyly óńdeý ónerkásibinde shamamen 1,5 trln teńgege 190 jobany júzege asyrý josparlanýda, bul 23 myń turaqty jumys ornyn ashýǵa múmkindik beredi.