Prezıdent Joldaýyn iske asyrý: Úkimet Jalpyulttyq is-sharalar josparyn bekitti
ASTANA. KAZINFORM — Búgin Úkimet otyrysynda Memleket basshysynyń bıylǵy 28 qazandaǵy «Jańa tarıhı kezeńdegi Qazaqstannyń ózekti mindetteri» atty Qazaqstan halqyna Joldaýyn iske asyrý jónindegi jalpyulttyq is-sharalar josparynyń» jobasy maquldanyp, tıisti qaýly qabyldandy.
— Jalpyulttyq is-sharalar josparynyń jobasy Joldaýdyń negizgi baǵyttary men Memleket basshysynyń bastamalary aıasynda qoıylǵan mindetterdi sapaly ári jedel sheshýge baǵyttalyp otyr. Úkimet makroekonomıkalyq turaqtylyqty qamtamasyz etý, ónerkásip pen agroónerkásip keshenin damytý, kólik jáne energetıka ınfraqurylymyn jańǵyrtý, áleýmettik qoldaýdyń tıimdiligin arttyrý, sondaı-aq memlekettik basqarý júıesin jetildirý máselelerine basa mán berýi kerek, — dedi Premer-mınıstr Oljas Bektenov.
Onyń aıtýynsha, ákimdikter óńirlerdegi ınfraqurylymdyq jobalardy sapaly júzege asyryp, áleýmettik nysandardyń qurylysyn, sý resýrstaryn tıimdi paıdalanýdy qamtamasyz etýge tıis.
— Zań jobalaryn ýaqtyly ázirlep, Quryltaı qaraýyna engizý qajet. Jospardyń árbir tarmaǵyn qarjylandyrý máselesin muqııat pysyqtańyzdar. Basty mindet — is-sharalardyń barlyǵyn tıimdi ári der kezinde oryndaý. Orynbasarlaryma bekitilgen mindetterge sáıkes árbir tarmaqtyń júzege asyrylýyn baqylap, úılestirýdi tapsyramyn, — dedi Úkimet basshysy.
Búǵan deıin Úkimet Prezıdent Joldaýyn iske asyrý jónindegi Jalpyulttyq is-sharalar josparyn talqylaıtynyn jazǵan edik.
