Prezıdent Joldaýy qurylys salasy men kásipkerliktiń damýyna jańa múmkindik ashady — kásipker
ASTANA. KAZINFORM — Memleket basshysynyń Qazaqstan halqyna arnaǵan Joldaýynda kásipkerlikti qoldaý, ekonomıkany damytý jáne qurylys salasynyń áleýetin arttyrý máselelerine erekshe mán berilgen. Bul bastamalar otandyq bıznestiń damýyna tyń serpin berip, kásipkerlerge jańa jobalardy júzege asyrýǵa múmkindik ashady. Bul týraly Astana qalasynyń kásipkeri, metsenat ári qoǵam belsendisi Hatam Shavhıev aıtty.
Onyń pikirinshe, shaǵyn jáne orta bıznesti qoldaýǵa baǵyttalǵan usynystar, ásirese, qurylys salasynda jumys isteıtin kásipkerler úshin mańyzdy. Sonyń ishinde 2027 jylǵy 1 qańtardan bastap mıkro jáne shaǵyn bızneske qatysty úsh jyldyq moratorıı engizý múmkindigin qarastyrý bastamasy kásipkerlerge túsetin ákimshilik júktemeni azaıtýǵa yqpal etýi múmkin.
— Mundaı bastama júzege assa, kásipkerler óz jumysyn turaqty júrgizip, óndiristik áleýetin arttyrýǵa jáne jańa jobalardy iske asyrýǵa kóbirek múmkindik alady. Bızneske qolaıly jaǵdaı jasaý — kásipkerliktiń damýyna tikeleı áser etetin mańyzdy faktor, — dedi Hatam Shavhıev.
Kásipker memlekettik organdar men kvazımemlekettik sektordyń satyp alýlaryna shaǵyn jáne orta bıznestiń qatysý múmkindigin keńeıtý, jetkizýshilerge qoıylatyn talaptardy jeńildetý jónindegi usynystardyń da mańyzy zor ekenin atap ótti. Onyń aıtýynsha, kásipkerler úshin túsinikti ári turaqty erejeler qalyptastyrý otandyq kompanııalardyń básekege qabilettiligin arttyrýǵa jol ashady.
Sondaı-aq qurylys salasynyń el ekonomıkasyndaǵy ornyna toqtalǵan ol bul baǵyttaǵy basty mindet tek jańa nysandar turǵyzýmen shektelmeıtinin jetkizdi. Sapaly ári qaýipsiz turǵyn úı salý, áleýmettik ınfraqurylymdy damytý, jergilikti mamandardy jumyspen qamtý jáne otandyq qurylys materıaldaryn keńinen paıdalaný da salanyń mańyzdy basymdyqtary sanalady.
— Qurylys — el ekonomıkasynyń mańyzdy salalarynyń biri. Bizdiń basty mindetimiz — sapaly ári qaýipsiz nysandar salý, turǵyn úı men áleýmettik ınfraqurylymdy damytý, jergilikti mamandardy jumyspen qamtý jáne otandyq qurylys materıaldaryn paıdalanýdy keńeıtý, — dedi ol.
Kásipkerdiń paıymynsha, memleket pen bıznes arasyndaǵy ózara senimge negizdelgen áriptestik nyǵaıǵan saıyn ekonomıkanyń damýyna da jańa múmkindikter ashylady. Al kásipkerlerge qolaıly orta qalyptastyrý — jańa jumys oryndaryn qurýmen qatar, eldiń áleýmettik-ekonomıkalyq turaqtylyǵyna da yqpal etetin mańyzdy qadam.
Hatam Shavhıev otandyq kásipkerlerdiń el ekonomıkasyn damytýǵa, bıznesti nyǵaıtýǵa jáne halyq ıgiligi úshin sapaly qurylys nysandaryn salýǵa úles qosýǵa daıyn ekenin jetkizdi.
Esterińizge sala keteıik, 28 qazanda Memleket basshysy Qazaqstan halqyna jyl saıynǵy Joldaýyn jarııalady.
