Prezıdent Joldaýy: Qazaqstanda «qyzyl aımaqtaǵy» JEO-lar sany 4 esege qysqardy
ASTANA. KAZINFORM - Memleket basshysy Qasym-Jomart Toqaevtyń 2025 jylǵy «Jasandy ıntellekt dáýirindegi Qazaqstan: ózekti máseleler jáne ony túbegeıli tsıfrlyq ózgerister arqyly sheshý» atty Joldaýynda bergen tapsyrmalaryn oryndaý sheńberinde Úkimet energetıkalyq jáne kommýnaldyq ınfraqurylymdy jańǵyrtýdy jalǵastyrý ústinde, dep habarlaıdy Úkimettiń baspasóz qyzmeti.
Jumys tozýdy azaıtýǵa, nysandardyń senimdiligin arttyrýǵa, jańa qýattardy engizýge jáne TKSh-ni basqarýdy tsıfrlandyrýǵa baǵyttalǵan.
«Qyzyl aımaqtaǵy» JEO-lar sany 19-dan 5-ke deıin qysqardy
2024-2025 jyldary elektr stansalarynda 20 energoblok, 118 qazandyq jáne 84 týrbına jóndeldi. Elektr stansalarynyń ortasha tozýy 56%-dan 53%-ǵa deıin, al jylý berý kezeńindegi tehnologııalyq aqaýlar sany 32%-ǵa tómendedi.
2026 jyly 2,6 GVt dástúrli jáne jańartylatyn qýat kózderin engizý josparlanyp otyr
Búginde Qyzylordada qýaty 240 MVt bolatyn bý-gaz qondyrǵysy (BGQ) iske qosyldy, Tekeli energokeshenin jańǵyrtý aıaqtaldy. Іri jobalardyń qatarynda – qýaty 1 GVt bolatyn «Túrkistan» BGQ bar. 2027 jyly jańa qýattardy iske qosý elektr energııasyna ishki suranysty jabýǵa múmkindik beredi.
TKSh-ny jańǵyrtý 700 den astam jobany qamtıdy
Ulttyq joba aıasynda 20 óńirdegi 451 tabıǵı monopolııa sýbektisiniń jaǵdaıy taldandy. Qazaqstandyq turǵyn úı kompanııasynyń jelisi boıynsha shamamen 145 mlrd teńgege 103 joba qarjylandyryldy. Qarajat jylý, sýmen jabdyqtaý jáne sý burý jelilerin, sý tazartý keshenderin rekonstrýktsııalaýǵa jáne óndiristik protsesterdi avtomattandyrýǵa baǵyttalady.
Sýmen jabdyqtaý jáne sý burý jelileriniń tozýy tómendep barady
Sýmen jabdyqtaý boıynsha kórsetkish 2023 jylǵy 40%-dan 2025 jyly 38%-ǵa deıin, sý burý boıynsha 56%-dan 54%-ǵa deıin tómendedi. 2029 jylǵa qaraı tozýdy tıisinshe 33%-ǵa jáne 41%-ǵa deıin tómendetý josparlanýda.
⠀
Smart Turmys kommýnaldyq salanyń derekterin biriktiredi
⠀
Ulttyq platforma jyljymaıtyn múlik nysandary, abonentter, esepteýler, tólemder jáne resýrstardy tutyný týraly derekterdi biriktiredi. 2026-2027 jyldary shamamen 4,76 mln ıntellektili esepteý aspaptaryn ornatý josparlanýyp otyr. Avtomattandyrý esepteýlerdiń dáldigin arttyrýy, tehnıkalyq jáne kommertsııalyq shyǵyndardy shekteýi jáne búgingi kúni qolmen jasalatyn 9,3 mıllıon esepke alý núktelerine tehnıkalyq qyzmet kórsetý shyǵyndaryn azaıtýy tıis.
⠀
2035 jylǵa qaraı gazben qamtý deńgeıin 80%-ǵa deıin jetkizý josparlanǵan
2026 jyldyń basyndaǵy aqparat boıynsha tabıǵı gazben 13,1 mln adam nemese halyqtyń 64,2%-y qamtamasyz etilgen. Sonymen qatar, «Beıneý – Bozoı – Shymkent» gaz qubyrynyń ekinshi jelisin qosa alǵanda, gaz tasymaldaý jáne gaz óńdeý ınfraqurylymy keńeıýde.
Energetıka men TKSh jańǵyrtý jumys istep turǵan nysandardyń senimdiligin arttyrýdy, jańa generatsııany engizýdi, kommýnaldyq jelilerdi jańartýdy, gazben jabdyqtaýdy damytýdy jáne esepke alýdy tsıfrlandyrýdy qamtıdy. Bul sharalar ınfraqurylymnyń tozýyn azaıtýǵa jáne kommýnaldyq qyzmetterdiń sapasyn arttyrýǵa baǵyttalǵan.
Osyǵan deıin Aqtóbe oblysynda 467 km elektr jelisi jańartylyp, JEO-da 3 qazandyq jóndeletini týraly jazdyq.
⠀
