Prezıdent Joldaýy: «Áleýmettik ámııan» jobasy 2025 jyly bastalady

ASTANA. KAZINFORM – Memleket basshysy Qasym-Jomart Toqaev «Ádiletti Qazaqstan: zań men tártip, ekonomıkalyq ósim, qoǵamdyq optımızm» atty Joldaýynda áleýmettik saıasattyń jańa baǵyttaryn atady.

«Áleýmettik turǵydan osal azamattarǵa qoldaý kórsetý – óte mańyzdy mindet. Sondyqtan memleket áleýmettik shyǵystardy birtindep ulǵaıtyp jatyr. Qazir bıýdjettiń jartysynan kóbi áleýmettik salaǵa jumsalady. Balaly otbasylardy qoldaý úshin sábı kútimine ótemaqy tóleý merzimi bir jyldan bir jarym jylǵa deıin uzardy.

Zııandy eńbek jaǵdaıynda jumys isteıtin azamattarǵa bıyldan bastap arnaıy tólemder berilip jatyr. «Ulttyq qor – balalarǵa» aýqymdy jobasy iske qosyldy. 7 mıllıon balanyń esepshotyna Ulttyq qordyń tabysynan jalpy somasy 300 mıllıardtan astam teńge aýdaryldy. Degenmen qazir memleket tarapynan qoldaý kórsetilgen kezde azamattardyń naqty tabysy eskerilmeı jatqanyn moıyndaý qajet. Basqasha aıtsaq, áleýmettik qoldaýǵa múlde muqtaj emes aýqatty otbasylar da memleketten kómek alady», - dedi Qasym-Jomart Toqaev.

Memleket basshysynyń sózinshe, mundaı jaıttar az emes.

«Osyny eskere otyryp, halyqty qoldaý tásilderin jetildire túsý qajet. Sondyqtan Úkimetke aldaǵy jyldyń basynan bastap «Áleýmettik ámııan» jobasyn júzege asyrýdy tapsyramyn.

Memlekettik qoldaý shyn máninde muqtaj adamdarǵa kórsetilýi qajet. Bir sózben, kez kelgen áleýmettik kómek ádil, ashyq jáne tıimdi bolýǵa tıis», - dedi Prezıdent.