Prezıdent joldardyń sapasy jaıly: Ázirge jaǵdaı máz emes

ASTANA. KAZINFORM – Respýblıkalyq mańyzy bar joldardy salýǵa otandyq kásiporyndardy tartý kerek. Bul týraly Úkimettiń keńeıtilgen otyrysynda Memleket basshysy Qasym-Jomart Toqaev aıtty.

«Kelesi – avtojol máselesi. Elimiz úshin aıryqsha mańyzdy «Astana-Balqash-Almaty» tas joly áli kúnge deıin jóndelip bitken joq. Qurylys 2017 jyldan beri júrip jatyr. Respýblıkalyq mańyzy bar «Atyraý-Astrahan», «Aqtóbe-Qandyaǵash», «Taldyqorǵan-Óskemen» joldarynyń jóndelip jatqanyna 5 jyldan asty. Bıyl osy jumystar birjola aıaqtalýǵa tıis», - dedi Qasym-Jomart Toqaev.

Prezıdent osy oraıda birneshe máseleni eskerý qajettigin aıryqsha aıtty.

«Qalyptasqan tájirıbege qarasaq, respýblıkalyq mańyzy bar joldardyń tenderin kóp jaǵdaıda tek shetel kompanııalary utyp alady. Mundaı jobalarǵa qolynan is keletin, tıisti tehnıkamen jabdyqtalǵan óz kásiporyndarymyzdy tartý kerek. Sonymen qatar, jol qurylysyna qajetti tehnıkany elimizde shyǵarý joldaryn damytyp, ózimizdiń daıyn ónimdi paıdalaný kerek. Jalpy, jol máselesine kelgende bir ǵana maqsat bolýǵa tıis. Respýblıkalyq nemese aımaqtyq jol bolsyn, elimizdegi joldyń bári sapaly bolýy kerek. Ázirge jaǵdaı máz emes»», - dedi Memleket basshysy.