Prezıdent joldar týraly: Astanany barlyq óńirmen baılanystyrýdy kózdeımiz

ASTANA. QazAqparat - Qazaqstan Prezıdenti oblys ákimdikteri óz aýmaǵynyń ishindegi aýdanaralyq joldardy retke keltirýi tıis ekendigin erekshe atap ótti, dep habarlaıdy «QazAqparat» HAA tilshisi.

«Biz, eń aldymen, respýblıkalyq mańyzy bar joldardy retke keltirýdi, tranzıtti qamtamasyz etýdi negizgi tapsyrma etip aldyq. Búgingi tańda osy jumyspen aınalysyp jatyrmyz. Respýblıkalyq mańyzy bar joldardyń 85 paıyzy jaqsy nemese qanaǵattanarlyq jaǵdaıda. Oblys ishindegi joldar da bar. Ol joldardyń tek 60 paıyzy qanaǵattanarlyq jaǵdaıda. Biz eń aldymen Astanany barlyq óńirmen baılanystyrýdy kózdep otyrmyz», - deıdi Memleket basshysy.

Nursultan Nazarbaev óz sózinde Astanany barlyq óńirlermen baılanystyrý arqyly ekonomıkany órkendetýge bolatynyn tilge tıek etti.

«Ol qadam ekonomıkanyń úlken artyqshylyǵyna aınalady. Bul - saýda, básekege qabilettilik, qozǵalys, jyldamdyq. Adamdardyń baılanysy nyǵaıyp, eńbek, aqsha, kapıtal qozǵalysqa túsedi. Qazir oblys ishindegi jáne aýdandar arasyndaǵy joldardy retke keltirýmen aınalysý kerektigin aıtyp otyrmyn. Múmkin, qajettiligi asa basym emes respýblıkalyq mańyzy bar joldardy qoıa turyp, aqshany sonda jibergen abzal bolar. Oblystardyń ózderi de óz ishindegi aýdanaralyq joldardy retke keltirýi tıis. Biz bunymen aınalysamyz», - dep shegeleı tústi Prezıdent.

Memleket basshysy sóz sońyn oıly ázilmen aıaqtady.

«Kórdińizder me? Ol joldar salynbaǵanda «nege salynbaıdy» dep aıtyldy. Saldyq - báribir «jaman» degennen qutylǵan joqpyz (kúldi). Suraq durys qoıylyp otyr, biraq máselelerdiń barlyǵy qadam-qadam saıyn sheshiledi», - dep túıdi Elbasy.

Eske sala ketsek, 22 jeltoqsan kúni Elbasy Nursultan Nazarbaev elimizdegi jetekshi BAQ ókilderine 2017 jyldy qorytyndylaýǵa arnalǵan suhbat berdi. Onda Prezıdent qazaq qoǵamyndaǵy eleýli ózgerister men ózekti máseleler týraly jýrnalıster suraǵyna jaýap berdi. Atalmysh suhbattyń televızııalyq nusqasy búgin respýblıkayq telearnalardyń efırinen kórsetildi.