Prezıdent Joldanýyna qatysty Qazaqstan Quryltaıy úndeý jasady

ASTANA. KAZINFORM — Búgin Quryltaıdyń jalpy otyrysynda depýtat Aıdos Sarym Prezıdent Qasym-Jomart Toqaevtyń «Jańa tarıhı kezeńdegi Qazaqstannyń ózekti mindetteri» atty Qazaqstan halqyna Joldaýyn iske asyrý boıynsha úndeý jasady. 

Qazaqstan Respýblıkasynyń Quryltaıy
Foto: Soltan Jeksenbekov / Kazinform

Ol qujatta qamtylǵan mańyzdy bastamalar men naqty maqsat-mindetter qoǵam tarapynan úlken qoldaý tapqanyn atap ótti.

— Shyn máninde, Memleket basshysynyń jańa Konstıtýtsııa qabyldanǵannan keıingi alǵashqy Joldaýy el tarıhynyń jańa, sapaly kezeńine jol ashady jáne týǵan Otanymyzdyń aldaǵy on jyldyqtardaǵy damý baǵytyn aıqyndaıdy. Onyń alǵysharttary belgili. Qazaqstan álemdegi ahýaldyń kúrdeliligine, boljamsyzdyǵyna qaramastan, ótken jeti jyldyń ishinde túbegeıli reformalardy batyl júzege asyrdy. Prezıdent Toqaevtyń strategııalyq kóregendigi Qazaqstandy halyqaralyq arenada bedeldi orta derjava jáne jahandyq dıalogtyń moıyndalǵan ortalyǵy deńgeıine kóterdi. Tabandy, ymyrasyz ózgerister logıkasy Ádiletti, Qýatty, Taza jáne Progressıvti Qazaqstandy qurýdyń negizine aınaldy. Osynyń bári eń aldymen halqymyzdyń qaltqysyz tańdaýynyń, bereke-birligi men ulttyq rýhynyń beriktiginiń arqasy dep bilemiz. Memleket basshysynyń bıylǵy Joldaýy — jańa josparlarymyz ben is-qımylymyzdyń doktrınasy, — dedi Aıdos Sarym QR Quryltaıynyń úndeýin jarııalaý kezinde.

Onyń aıtýynsha, Joldaýda aldymyzǵa tarıhı mindet qoıylyp otyr. Ol — búkil ekonomıkalyq kapıtaldy ınfraqurylymdy túbegeıli jańartýǵa, áleýmettik salany sapaly damytýǵa jáne qazaqstandyqtardyń turmys deńgeıin kóterýge jumyldyrý.

— Igi bastamanyń ózeginde adam men onyń quqyǵy, qadir-qasıeti jáne erteńgi kúnge degen senimi tur. Prezıdent 2027 jyldy «Jalpyhalyqtyq aýqymdy qurylys jyly» dep jarııalady. Osy bastamanyń aıasynda búkil elimiz boıynsha ınjenerlik, jol-kólik, medıtsınalyq jáne mádenı nysandar boı kóteredi. Bul — kommýnaldyq jáne áleýmettik ınfraqurylymdy jańǵyrtýdyń buryn-sońdy bolmaǵan jobasy. Memleket basshysy Joldaýynda elimizdiń ındýstrııalyq-tehnologııalyq turǵyda jedel damýyna qajetti tetikter ázirleý qajettigine basa nazar aýdardy. Aldymyzda energetıkalyq derbestik pen tranzıttik tasymaldy arttyrý, aýyl sharýashylyǵyn jandandyryp, elimizdi Eýrazııanyń kólik-logıstıkalyq ortalyǵyna aınaldyrý sııaqty keshendi maqsattar bar, — dedi depýtat.

Onyń sózine qaraǵanda, Qazaqstan Respýblıkasynyń Quryltaıy Prezıdent aıqyndaǵan ulttyq jańǵyrý baǵdarlamasyn tolyq qoldaıdy jáne ony zańnamalyq, saraptamalyq jáne qoǵamdyq turǵyda ilgeriletýge bar kúsh-jigerin jumyldyrady.

— Prezıdenttiń Joldaýy halqymyzdyń talap-tilegimen tolyq úılesim taýyp otyr. Endigi mindetimiz — osy is-sharalardy el bolyp eńserý. Uly maqsattar qaı kezde de uly birlikti talap etedi. Sondyqtan, osyndaı tarıhı sátte biz ár azamatty, tutas qoǵamdy bolashaq úshin, memleketimizdiń órkendeýi úshin birigýge, ıgi isterge tize qosyp, atsalysýǵa shaqyramyz, — dedi Aıdos Sarym.

Quryltaı Tóraǵasy Aıbek Dádebaı bul úndeý barlyq fraktsııa depýtattarynyń ortaq ustanymy ekenin atap ótti.

Aıta keteıik, jaqynda Úkimet Memleket basshysynyń bıylǵy 28 qazandaǵy «Jańa tarıhı kezeńdegi Qazaqstannyń ózekti mindetteri» atty Qazaqstan halqyna Joldaýyn iske asyrý jónindegi jalpyulttyq is-sharalar josparynyń» jobasyn maquldanyp, tıisti qaýly qabyldady.