Bıyl 20 trln teńgeni qamtıtyn 12 memlekettik aýdıt júrgizilgen: Prezıdent Smaıylovty qabyldady
ASTANA. KAZINFORM - Qasym-Jomart Toqaevqa bıylǵy I jartyjyldyqta 20 trıllıon teńgeni qamtıtyn 12 memlekettik aýdıt júrgizilgeni týraly baıandaldy. Bul 2024 jyldyń osy kezeńimen salystyrǵanda 7,1 esege artyq, dep habarlaıdy Aqordanyń baspasóz qyzmeti.
Álıhan Smaıylovtyń aıtýynsha, aýdıtorlyq tekserister orta bilim berý, dári-dármekpen qamtamasyz etý, tsıfrlyq damý, elektr energetıkasy jáne joǵary jetistikter sportyn qarjylandyrý sekildi negizgi salalardy qamtyǵan.
Úkimetke jáne aýdıt júrgizilgen nysandarǵa 60-tan astam usynym men 450 tarmaqtan turatyn uıǵarym berildi. 20 fakti boıynsha is materıaldary quqyq qorǵaý organdaryna joldandy.
Prezıdentke Joǵary aýdıtorlyq palatanyń usynysymen ázirlengen zańnamalyq bastamalar jóninde egjeı-tegjeıli málimet berildi. Máselen, endi Joǵary aýdıtorlyq palata bıýdjetten tys qorlardy tekserý quzyretine ıe boldy.
Memleket basshysynyń tapsyrmalaryn oryndaý maqsatynda Ulttyq qor qarjysyn monıtorıngteý jónindegi komıssııa jumysy qaıta uıymdastyryldy. Bul Qor qarajatynyń jumsalýyna baqylaýdy kúsheıtip, jarııalylyqty arttyrýǵa múmkindik beredi.
Budan bólek, jylytý maýsymyna daıyndyqqa salǵyrt qaraǵany úshin jylýmen qamtamasyz etetin kásiporyndar men olardyń birinshi basshylarynyń jaýapkershiligin kúsheıtý, sondaı-aq naryqtyń barlyq sýbektilerine arnalǵan taýarly gazdyń bólshek baǵasyna memlekettik baqylaýdy keńeıtý sekildi mańyzdy bastamalar bar.
Qasym-Jomart Toqaev memlekettik aýdıt júıesin kezeń-kezeńimen damytýdy tapsyrdy. Bul rette onyń tıimdiligi men ashyqtyǵyna basa mán bergen jón.
Prezıdent memleket qarajatynyń jumsalýyn baqylaýǵa zamanaýı tsıfrlyq tehnologııalardy engizý mańyzdy ekenin atap ótti. Sonymen qatar basy artyq shyǵyndardy azaıtý, ulttyq resýrstardan túsetin paıdany barynsha eseleý qajet ekenine nazar aýdardy.
Osyǵan deıin Qasym-Jomart Toqaev Prezıdenttiń Aýǵanstan boıynsha arnaýly ókili Erkin Tuqymovty qabyldaǵan bolatyn.