Prezıdent Joǵarǵy sot tóraǵasy Aslambek Merǵalıevti qabyldady
ASTANA. KAZINFORM – Memleket basshysyna sot júıesi qyzmetiniń bıylǵy bes aıdaǵy qorytyndysy jóninde málimet berildi. Bul týraly Aqordanyń baspasóz qyzmeti málimdedi.
Aslambek Merǵalıevtiń aıtýynsha, ótken jyldyń uqsas kezeńimen salystyrǵanda sot organdaryna túsken talap-aryz ben shaǵymdar 18,1 paıyzǵa ulǵaıǵan. Bul azamattardyń sot júıesine senimi artyp kele jatqanyn kórsetedi. Sonymen qatar tatýlastyrý rásimin qoldanýda oń dınamıka baıqalady.
Sot tóreliginiń sapasy men qoljetimdiligin arttyrýǵa baǵyttalǵan júıeli sharalardyń nátıjesinde memleketpen aradaǵy daý kezinde azamattardyń quqyqtaryn qorǵaý kórsetkishi edáýir jaqsardy. Ákimshilik sotta qaralǵan mundaı isterdiń 57,8 paıyzynda úkim azamattar men zańdy tulǵalardyń paıdasyna sheshildi.
Joǵarǵy sot tóraǵasy qylmystyq protsess kezinde tulǵanyń konstıtýtsııalyq quqyqtary men bostandyǵyn qamtamasyz etý sharalary jóninde baıandady. Memleket basshysynyń tapsyrmasyna sáıkes, Qylmystyq jáne Qylmystyq-protsestik kodeksterge revızııa jasaldy. Azamattar men kásipkerlerdiń quqyqtaryn kúsheıtýdi, taraptardyń jaryspalylyǵy men teń quqylyǵyn nyǵaıtýdy, qylmystyq protsesti ońtaılandyryp, bıýrokratııadan aryltaýdy kózdeıtin jańa zań jobasy ázirlendi.
Budan bólek, Prezıdentke sot júıesin tsıfrlandyrý barysy jáne kassatsııalyq sottardy qurý jumystary aıaqtalǵany jóninde esep berildi.
Kezdesý sońynda Qasym-Jomart Toqaev sýdıalar men sot qyzmetkerlerin taǵy da kásibı merekelerimen quttyqtady.
Prezıdent zań ústemdigin qamtamasyz etip, sot tóreliginiń sapasyn arttyrý, sondaı-aq sýdıalardyń táýelsizdigi men jaýapkershiligin kúsheıtý maqsatynda sot júıesin odan ári jetildirý mańyzdy ekenine nazar aýdardy.
Aıta keteıik, Joǵarǵy sot «Eýrazııalyq saýda júıesi» taýar bırjasy jeńip alǵan tenderdi zańsyz dep tanydy.