Prezıdent jyl sońynda resmı saparmen Japonııaǵa barýy múmkin
ASTANA. KAZINFORM — Memleket basshysy Qasym-Jomart Toqaevtyń jyl sońynda Japonııaǵa resmı saparyn uıymdastyrý máselesi talqylandy.
Bul týraly Qazaqstan Respýblıkasy Premer-mınıstriniń orynbasary — Syrtqy ister mınıstri Murat Nurtileý málim etti.
— Eń aldymen, shaqyrýymdy qabyl alyp, Qazaqstanǵa alǵashqy resmı saparmen kelgen qadirli áriptesim, Japonııanyń Syrtqy ister mınıstri Takeshı Ivaıa myrzaǵa rızashylyǵymdy bildiremin. Qazirgi geosaıası jaǵdaıda saparyńyzdy ekijaqty qarym-qatynastardy jańa deńgeıge kóterý jolyndaǵy oraıly is-shara dep qabyldaımyz. Bıyl Tokıodaǵy kezdesýden keıin qysqa merzimde sizben qaıta kezdesip otyrmyz. Kezdesý barysynda kún tártibindegi máselelerdi talqyladyq, — dedi Murat Nurtileý BAQ aldynda málimdeme jasap.
Syrtqy ister mınıstriniń málimdeýinshe, ekijaqty kelissóz mazmundy ári jemisti ótti.
— Japonııa Azııa aýmaǵyndaǵy senimdi strategııalyq seriktes el ekenin Japonııa delegatsııasyna shegelep aıttym. Bolashaqta bizdiń ózara komplımentarly múmkindigimizdi biriktiretin bolsaq, saýdanyń ósetinine kúmán joq. Qazaqstan men Japonııa arasyndaǵy saýda aınalymy 2,5 mlrd dollarǵa taıap qaldy. Jyl aıaǵyna qaraı Qazaqstan Respýblıkasynyń Prezıdenti Qasym-Jomart Toqaevtyń Japonııaǵa resmı saparyn uıymdastyrý máselesin jan-jaqty talqyladyq, — deıdi vedomstvo basshysy.
Búgin Astanaǵa alǵash resmı saparmen Japonııa Syrtqy ister mınıstri Takeshı Ivaıa keldi.
Aıta ketsek, Memleket basshysy Kongo prezıdentiniń arnaýly ókili Patrık Mpoıı Lýabeıany qabyldady.