Prezıdent JI-ge mamandanǵan jańa zertteý ýnıversıtetin ashýdy tapsyrdy
ASTANA. KAZINFORM — Prezıdent Qasym-Jomart Toqaev elimizde jasandy ıntellekt salasyna mamandanǵan jańa zertteý ýnıversıtetin qurýǵa tapsyrma berdi.
Bul bastamany Memleket basshysy Jasandy ıntellektini damytý jónindegi keńestiń alǵashqy otyrysynda aıtty.
Prezıdent elimizde JI mamandaryn oqytatyn arnaıy bir oqý orny joq ekenin atap ótti. Olar jekelegen ýnıversıtetterde ǵana oqyp, bilim alyp jatyr.
— Bul máseleni qolǵa alyp, naqty sheshim qabyldaý kerek. Álemde mundaı tájirıbe burynnan bar. Mysaly Birikken Arab Ámirlikterinde Muhamed Ben Zaıd atyndaǵy mamandandyrylǵan jasandy ıntellekt ýnıversıteti quryldy. Qazaqstanda 79 ýnıversıtette IT mamandyǵy boıynsha 63 myńnan astam stýdent oqıdy. Byltyrdan beri bilim berý baǵdarlamalaryna JI páni jappaı engizilip jatyr. Sondaı-aq ýnıversıtetterde JI jónindegi ǵylymı zertteý ortalyqtary jumys isteıdi, — dedi Memleket basshysy.
Bilikti ǵalymdarymyz byltyr KAZLLM atty qazaq tiliniń jeke modelin jasap shyǵardy. Osynyń bári mańyzdy jobalar ekeni sózsiz. Endi Prezıdent elimizde jasandy ıntellekt salasyna mamandanǵan jańa zertteý ýnıversıtetin qurýdy tapsyrdy.
— Oqý ornyna arnaıy mártebe bergen jón. Sondaı-aq, bul jumysqa álemniń úzdik oqý oryndaryn seriktes retinde tartý qajet. Úkimet jyl sońyna deıin osy másele boıynsha naqty usynys berýge tıis. Osyndaı jańa oqý orny bizge ne úshin qajet degen saýal da týyndaýy múmkin. Basty maqsat — ekonomıkanyń barlyq salasyna JI tehnologııasyn engizetin bilikti mamandardy daıarlaý. Zertteý ýnıversıteti bilim ǵylym, ınnovatsııa jáne halyqaralyq baılanys ortalyǵy retinde jumys isteýi kerek, — dedi Prezıdent.
Aıta keteıik, Jasandy ıntellektini damytý jónindegi keńes Prezıdent Jarlyǵymen qurylǵan jáne ol — eldegi JI damytýdyń strategııasyn qalyptastyratyn, tehnologııalardy ekonomıkanyń negizgi salalary men memlekettik basqarýǵa engizýdi súıemeldeıtin, sondaı-aq salalyq baǵdarlamalar men strategııalyq qujattarǵa usynystar ázirleıtin keńesshi-konsýltatıvtik organ.
Birinshi otyrysqa Qazaqstan Úkimetiniń ókilderi, onyń ishinde Premer-Mınıstr men salalyq mınıstrler, sondaı-aq álemniń jetekshi ýnıversıtetteri men kompanııalarynan halyqaralyq sarapshylar men ǵalymdar qatysýda. Olardyń qatarynda BAÁ, AQSh jáne Qytaı mamandary bar.