Prezıdent Jezqazǵan ónerkásibin qalpyna keltirýdiń jańa baǵdarlamasyn ázirleýdi tapsyrdy

JEZQAZǴAN. QazAqparat - Qazaqstan Prezıdenti Nursultan Nazarbaev Úkimetke Jezqazǵan ekonomıkalyq ónerkásiptik óńirin qalpyna keltirý jáne damytýdyń arnaıy baǵdarlamasyn ázirleýdi tapsyrdy.

Bul týraly Memleket basshysy búgin «Jezqazǵan-Beıneý» jáne «Arqalyq-Shubarkól» eki jańa temir jol tarmaǵynyń ashylý rásiminde málimdedi.

«Sońǵy jyldary mys keniniń taýsylýyna baılanysty úlken qıyndyqtarǵa kezdestik. Jezqazǵan mys balqytý kombınatyn toqtatýǵa májbúr boldyq. Úkimetke Jezqazǵan ekonomıkalyq ónerkásiptik óńirdi qalpyna keltirýdiń jáne damytýdyń arnaıy baǵdarlamasyn ázirleýdi tapsyrdym», dedi N. Nazarbaev.

Onyń aıtýynsha, «burynǵyǵa qaraǵanda kólemi 20 mln. tonna baı ken alý úshin jáne Jezqazǵan mys balqytý zaýytyn iske qosý úshin» ken mańynda ornalasqan kentterden adamdardy basqa oryndarǵa kóshirýge 240 mln. dollar bólindi.