Prezıdent: Jer sheteldikterge satylmaıdy - bul máselege endi oralmaımyz

NUR-SULTAN. QazAqparat - Qazaqstan Prezıdenti Qasym-Jomart Toqaev osy ýaqytqa deıin 12,8 mln gektar ıgerilmegen jerdiń 7 mln gektary memleketke qaıtarylǵanyn málim etti, dep habarlaıdy QazAqparat tilshisi.

«Igerilmegen jáne tıimsiz ıgerilgen jerlerdi anyqtap, ony alyp qoıý maqsatymen ǵaryshtan monıtorıng jasaýdy zańnamalyq turǵydan bekittik. Túgendeý barysynda anyqtalǵan 12,8 mln gektar ıgerilmegen jerdiń 7 mln gektary memleketke qaıtaryldy. Jerdi aldyń ba, ony ıgerý kerek», - dedi Qasym-Jomart Toqaev Úkimettiń keńeıtilgen otyrysynda.

Qasym-Jomart Toqaev 2021 jyly Jer kodeksiniń jekelegen normalaryna jarııalanǵan moratorıı aıaqtalatynyn aıtty.

«Osyǵan baılanysty bul másele jóninde túpkilikti sheshim qabyldaýymyz kerek. Negizgi máseleni aıqyndap aldyq. Jer sheteldikterge satylmaıdy. Bul máselege endi oralmaımyz», - dedi ol.