Prezıdent JEO-lardyń tozý problemasy týraly: Bul ákimderdiń jaýapkershilik aımaǵyna jatady

ASTANA. QazAqparat – Memleket basshysy Qasym-Jomart Toqaev Úkimettiń keńeıtilgen otyrysynda jylý-elektr ortalyqtaryna eń birinshi kezekte qaı organ jaýapty ekenin ashyp aıtty, dep habarlaıdy QazAqparat tilshisi.

«Jylý-elektr ortalyqtarynyń ortasha tozý deńgeıi el boıynsha 66%-ǵa jetti. Al keıbir qalalarda 80%-dyq shetin deńgeıden asyp ketken. JEO-lardyń úshten biri jarty ǵasyrdan astam ýaqyt jumys istep tur. Shyǵys Qazaqstan oblysynyń Rıdder jáne Shemonaıha qalalarynda jylýmen jabdyqtaý jelileri tolyǵymen tozǵan», - dedi Memleket basshysy.

Prezıdenttiń aıtýynsha, ákimdikterge máseleniń bárin Úkimetke aýdarýdy doǵarý kerek.

«Men birneshe ret Úkimetke energııa obektilerin ýaqtyly jańǵyrtýdy baqylaýǵa alýdy tapsyrdym. Ákimdikter de bul máseleni ózdiginen sheshe almaıtynyn alǵa tartyp, úkimetke aýdaryp keldi. Bul sizdiń nysandaryńyz, sizderdiń jaýapkershilik aımaqtaryńyzda», - dedi Qasym-Jomart Toqaev.

Aıta keteıik, búgin Memleket basshysy Qasym-Jomart Toqaevtyń tóraǵalyǵymen Úkimettiń keńeıtilgen otyrysy ótip jatyr.

Jıyn barysynda elimizdiń bıylǵy áleýmettik-ekonomıkalyq damýynyń negizgi kórsetkishteri týraly esep beriledi jáne Úkimettiń 2023 jylǵa arnalǵan jumys jospary qarastyrylady dep josparlanyp otyr.