Prezıdent: Jeńis úshin soǵysqa attanǵan 1,2 mln qazaqstandyqtyń teń jartysy erlikpen qaza tapty
ASTANA. KAZINFORM – Ekinshi dúnıejúzilik soǵystaǵy jeńiske Qazaqstan halqynyń qosqan úlesi ólsheýsiz. Prezıdent Qasym-Jomart Toqaev elordanyń Táýelsizdik alańynda ótip jatqan áskerı paradta osyndaı oı aıtty.
- Halqymyz Uly Jeńiske ólsheýsiz úles qosty. Uly Otan soǵysy jyldarynda maıdanǵa 1 mıllıon 200 myńnan astam qazaqstandyq attandy. Olardyń teń jartysy erlikpen qaza tapty. Keler urpaqtyń jarqyn ári beıbit keleshegi úshin óz ómirin qurbandyqqa shaldy. Dańqty ul-qyzdarymyz erliktiń ozyq úlgisin kórsetti. Qazaqtyń jaýjúrek ult ekenin pash etti. 500-den astam jaýyngerimiz Keńes Odaǵynyń Batyry atandy. Talǵat Bıgeldınov, Sergeı Lýganskıı, Saǵadat Nurmaǵambetov, Ivan Panfılov, Baýyrjan Momyshuly, Núrken Ábdirov, Málik Ǵabdýllın, Sabyr Rahımov, Mánshúk Mámetova, Álııa Moldaǵulova, Raqymjan Qoshqarbaev, Hıýaz Dospanova jáne basqa da kóptegen qaharmandarymyz óshpes iz qaldyrdy, - dedi Memleket basshysy.
Qasym-Jomart Toqaev tyl eńbekkerleri soǵys jyldary jankeshtilik pen tabandylyq tanytqanyn eske aldy.
- Qazaqstannan maıdanǵa bir jarym myń vagon kıim-keshek pen azyq-túlik jiberildi. Elimizge júzdegen kásiporyn kóshirildi, kóptegen jańa óndiris salyndy. Olar óte qysqa merzim ishinde maıdanǵa qajet ónimder shyǵara bastady. Jurtymyz judyryqtaı jumylyp, kúni-túni jumys istep, qarý-jaraq pen oq-dári daıyndady, áskerı kıim tikti. Soǵystaǵy on oqtyń toǵyzy Qazaqstanda jasaldy. Uly Jeńisti ulyqtaý degenimiz, bul – eń aldymen, erjúrek batyrlarymyzdy jadymyzda máńgi saqtaý degen sóz. Olardyń erligi men eńbegin jas urpaq bilip ósýge tıis, - dedi Prezıdent.
Aıta ketý kerek, búgingi áskerı sherýge 4 myńnan astam áskerı qyzmetshi, 200-den astam áskerı tehnıka, 66 ushý apparaty tartylǵan.
Sondaı-aq, paradta bıyl satyp alǵan sý jańa Airbus A-400 áskerı-kólik ushaǵy alǵash ret qatysady. Armııalyq Mı-17, Mı-171Sh, Mı-35 jáne kóliktik S-295, Tý-154M, L-410 ushaqtary, Sý-30SM, Sý-25 joıyǵysh ushaqtary, L-39 oqý-jaýyngerlik ushaǵynyń ekıpajdary sherýdiń aıbynyna áýeden aıbyn qospaq.