Prezıdent Jeńis kúnine oraı birqatar sharaǵa qatysady
«BAQ ókilderi Prezıdenttiń Jeńis kúni meıramyna oraı ótkiziletin is-sharalarǵa qatysýyna baılanysty saýaldaryn joldap jatyr. Bıyl 9 mamyr kúni Memleket basshysy Qasym-Jomart Toqaev elordadaǵy «Otan qorǵaýshylar» monýmentindegi Máńgilik alaýǵa dástúrli gúl qoıý rásimine qatysýdy josparlap otyr. Sonymen qatar Prezıdent 6 mamyrda Otan qorǵaýshylar kúni men Jeńis kúnine arnalǵan saltanatty jıynǵa qatysady. Memleket basshysynyń tapsyrmasy boıynsha bıyl barlyq óńirde soǵys ardagerlerine kem degende 1 mıllıon teńgeden birjolǵy járdemaqy berilip jatyr», - dedi Rýslan Jeldibaı.
Sonymen qatar ol tyl eńbekkerleri men olarǵa teńestirilgen azamattarǵa da materıaldyq qoldaý kórsetiletinin aıtty.
«8-9 mamyr kúnderi oblys ákimderi deńgeıinde soǵys ardagerlerimen jáne olardyń otbasy múshelerimen arnaıy kezdesýler uıymdastyrylady. Búkil elimiz boıynsha «Ardagerlerge taǵzym» qaıyrymdylyq aktsııasy ótedi. Soǵys ardagerlerine memleket tarapynan qajetti kómek aldaǵy ýaqytta da júıeli túrde beriledi», - dedi baspasóz hatshysy.
