Prezıdent jazýshy Sábıt Dosanovtyń jaqyndaryna kóńil aıtty

ASTANA. KAZINFORM - Prezıdent Qasym-Jomart Toqaev kórnekti qalamger, dramatýrg, «Otan» ordeniniń ıegeri, Memlekettik jáne M.Sholohov atyndaǵy halyqaralyq syılyqtardyń laýreaty Sábıt Dosanovtyń dúnıeden ótýine baılanysty onyń otbasy men jaqyn týystaryna kóńil aıtty.

— Sábıt Aıtmuhanuly qazaq ádebıetiniń órkendep qanat jaıýyna eleýli úles qosty. Ulttyq proza men dramatýrgııanyń damýyna naǵyz shyǵarmashyl tulǵa retinde bar sanaly ǵumyryn arnady. Kórkem týyndylary súıikti oqyrmandarynyń tarapynan joǵary baǵalandy. Sońyna óshpes ádebı baı mura qaldyrǵan Sábıt Aıtmuhanulynyń jarqyn beınesi halqymyzdyń júreginde máńgi saqtalady. Marqumnyń ımany salamat, jany jánnatta bolsyn, — dep jazylǵan jedelhatta. 

Sábıt Dosanov 1940 jyly 12 qańtarda Qostanaı oblysy, Amankeldi aýdanynyń Baıǵabyl aýylynda týǵan.

Qalamger Afrıkadaǵy Dúndý, Qazaqstandaǵy Qostanaı qalalarynyń, Aqsýat, Amankeldi aýdandarynyń qurmetti azamaty atanǵan.

Kóptegen roman, povest, áńgimelerdiń avtory. «Qaıyrly tań», «Janr taǵdyry», «Seksen bestiń kóktemi», «Adaspańdar, adamdar», «Totem pod chadroı», «Tenzor stepnogo kýrgana» atty kitaptary bar.

1998 jyly memlekettik «Sanat» baspasynan qazaq tilinde, al 2003 jyly Máskeýdiń «Sovetskıı pısatel» baspasynan orys tilinde «Jıyrmasynshy ǵasyr» romany jaryq kórdi.

2002 jyly «Sovetskıı pısatel» baspasynan tańdamaly shyǵarmalarynyń bir tomdyǵy jaryqqa shyqty.

«Daýyl», «Erteń bıýro» atty dramalary M.Áýezov atyndaǵy akademııalyq drama teatrynda, Atyraý, Jezqazǵan, Semeı, Taraz, Bishkek teatrlarynda qoıyldy.