Prezıdent jazǵa taman taǵy bir jańalyqty jarııalaıdy - Joldasbekov
ASTANA. QazAqparat - Búgin QR Aqparat jáne kommýnıkatsııalar mınıstrliginiń keńeıtilgen alqa májilisine qatysqan qoǵam qaıratkeri Myrzataı Joldasbekov Memleket basshysynyń aldaǵy jazda qazaq úshin jaǵymdy taǵy bir jańalyqty jarııalaıtynyn jetkizdi, dep habarlaıdy QazAqparat tilshisi.
Sóz barysynda qoǵam qaıratkeri Elbasynyń «Uly dala ulaǵattary» atty kitabyna toqtalǵan bolatyn. «Sonda ol kisiniń (Elbasynyń-red.) bárin bilip turyp, aıtqan bir keremet sózi bar. «Meni qazaq tilinde sóıleı almaıdy dep kim aıtady? Sóıleı alamyn, árıne. Frantsııa men Reseıdiń prezıdenti, Qytaıdyń basshysy óziniń tilinde baıandama jasaıdy, men de memlekettik tilde sóıleımin. Sondyqtan biz jan-jaǵymyzǵa qaraýymyz kerek». Sol kitapta jazylǵan ǵoı, alǵashqy kezde osy Tselınogradta 17-aq paıyz qazaq boldy. Qazir eń qazaǵy kóp qala - Astana. Ótkende Elbasymen eptep sóılesip qalyp edim. Qudaı qalasa, bıyl jazda Qazaqstan xalqynyń sany 18 mıllıonǵa jetkenin jarııalaıtyn bolamyz dep jatyr eken. Bul úlken qýanysh dep oılaımyn», - dedi Joldasbekov.
Aıta keteıik, búgingi alqa májilisinde mınıstr Dáýren Abaev aqparat pen kommýnıkatsııalar salasynda atqarylǵan jumystar boıynsha esep berip, otandyq telearnalardyń aldyna birqatar mindetter qoıdy.
Al qoǵamdyq keńestiń múshesi Bıbigúl Jeksenbaı memlekettik tilde xabar taratatyn buqaralyq aqparat quraldaryn barynsha damytý qajettigin jetkizdi.
