Prezıdent jaıylymdyq jerlerdiń naqty kimderge berilýi tıis ekenin aıtty
ASTANA. KAZINFORM – Memleket basshysy Qasym-Jomart Toqaev Aýyl sharýashylyǵy eńbekkerleriniń ekinshi forýmynda sóılegen sózinde jaıylymdyq jer máselesine erekshe toqtaldy. Bul týraly Aqordanyń baspasóz qyzmeti habarlady.
– Ekinshi, bul – jer máselesi. Halyq jerdiń ıgiligin kórýi kerek. Men birneshe jyl buryn zańsyz alynǵan jáne ıgerilmeı bos jatqan jerlerdi qaıtaryp alý týraly naqty tapsyrma berdim. Búgin osy másele boıynsha mınıstr baıandady. 2022 jyldan beri 14 mıllıon gektardan astam aýyl sharýashylyǵy jeri memleketke qaıtaryldy. Jerdi qolynan is keletin, jumys isteýge nıetti azamattarǵa berý kerek degen tapsyrma birneshe ret aıtyldy. Alaıda, bul mańyzdy jumys baıaý júrgizilip jatyr. Sondyqtan Joldaýda memleketke qaıtarylǵan jerdi kelesi jyldyń ortasyna deıin túgeldeı turaqty aınalymǵa engizý týraly tapsyrma berildi. Ákimdikterdiń osy máselege qatysty josparlary qaǵaz júzinde qalyp qoımaýy kerek. Eń bastysy, jer taǵy da ıgerilmeı, bos qalmaýy qajet.
Úkimet qazir mal sharýashylyǵy salasyndaǵy bıznesti qoldaý josparyn ázirlep jatyr. Jaıylymdyq jerler aýyl turǵyndaryna jáne naqty jospary bar ınvestorlarǵa berilýge tıis. Kelesi jyldyń ortasynda qabyldanatyn bul qujatta osy máseleniń sheshimderi aıqyn kórsetilýi kerek, - dedi Memleket basshysy.
Forýmda Qasym-Jomart Toqaev jerge beriletin kepildik qunyna qatysty da oıyn aıtty.
– Taǵy bir túıtkil – jerge beriletin kepildik qunnyń tómen bolýy. Kadastrlyq baǵalaý júıesi qazirgi naryqtaǵy shynaıy ahýalǵa múldem sáıkes kelmeıdi. Úkimet bul máselege nazar aýdarýy kerek, kadastrlyq qundy aıqyndaý tásilin qaıta qaraýǵa tıis. Jer qatynastary salasyndaǵy kedergiler qazirgi zamanǵa saı sharýashylyqtar qurýǵa bóget bolyp otyr. Men Joldaýymda Úkimetke kelesi jyldyń sońyna deıin Jer resýrstarynyń biryńǵaı tsıfrlyq kartasyn ázirleýdi tapsyrdym. Quzyrly mınıstrlikter osy mańyzdy jumys boıynsha ne istelip jatqanyn 7 kúnniń ishinde baıandaýy kerek, - dedi Memleket basshysy.
Prezıdent sondaı-aq jer resýrstaryna monıtorıng júrgizý tásilderin qaıta qaraý kerek ekenin qaperge saldy.
– Kelesi másele. Jer telimderi elektrondy konkýrs arqyly berilýi qajet. Jer alǵan azamattardyń eń basty mindeti – jerdi tıimdi ıgerý, ıaǵnı, berilgen jerdi kádege jaratý. Buǵan qosa, jer resýrstaryna monıtorıng júrgizý tásilderin qaıta qaraý qajet. Qazir aýyl sharýashylyǵy jerlerine qatysty derekter tolyq emes. Mundaı ahýal jerge baqylaý jasaýǵa jáne ıgerilmeı bos jatqan jerlerdi qaıtaryp alýǵa kedergi keltiredi. Jerdi bólip-taratý úderisi boıynsha aqparat ashyq ári qoljetimdi bolýy kerek, - dedi Qasym-Jomart Toqaev.
Eske sala keteıik, budan buryn Qasym-Jomart Toqaevtyń Aýyl sharýashylyǵy eńbekkerleriniń ekinshi forýmynda sóz sóılegenin jazǵanbyz.