Prezıdent jaýapkershilik pen tártip qaǵıdattaryn dáripteýdiń mańyzyna toqtaldy
ASTANA. KAZINFORM – Memleket basshysy Qasym-Jomart Toqaev ǵalymdardy marapattaý rásiminde sóılegen sózinde jaýapkershilik pen tártip qaǵıdattaryn dáripteýdiń mańyzyna toqtaldy. Bul týraly Aqordanyń baspasóz qyzmeti habarlady.
– Osy kúrdeli úderiste ǵalymdar erekshe ról atqarady. Óıtkeni olar órkenıet qundylyqtaryn dáriptep, sanatkerlik jáne moraldyq qasıetterimen kópke úlgi kórsetedi. Naǵyz ǵalymdar eskilik pen qarańǵylyqqa qarsy kúrestiń alǵy shebinen tabylyp, aǵartýshylyq pen bilim jolynda árdaıym top bastaǵan. Álemniń ekinshi ustazy ál-Farabı dóp basyp aıtqandaı, «Tárbıesiz berilgen bilim – adamzattyń qas jaýy». Sondyqtan gýmanızm, ádildik, jaýapkershilik qundylyqtary saltanat quryp, óskeleń urpaqty adamgershilikke jáne zańdy qurmetteýge tárbıelegende ǵana shynaıy órkendeýge bet alamyz. Bizdiń qoǵam jaqsy men jaman týraly destrýktıvti túsinikterdiń jetegine ermeýge tıis, tól bolmysymyzǵa jat dúnıetanymǵa kózsiz senbeýi qajet. Onyń saldary aýyr bolady. Yntymaq-birligimiz ben turaqtylyǵymyzdyń irgesin shaıqap, áleýmettik jáne ultaralyq alaýyzdyqty qozdyrǵysy keletinderdiń áreketine zań júzinde qatań tosqaýyl qoıylady. Konstıtýtsııada jazylǵandaı, elimizde zań men tártip ústemdik qurýy kerek. Ǵalymdarymyz únsiz qalmaı, qoǵamda, ásirese, jastar arasynda jaýapkershilik pen tártip qaǵıdattaryn dáripteýi qajet dep sanaımyn. Quqyqtyq nıgılızmge jol joq. Bizdiń tańdaýymyz – zańǵa baǵynatyn parasatty qoǵam, - dedi Prezıdent.
Buǵan deıin ǵalymdardy marapattaý rásiminde sóılegen sózinde ǵylym ekonomıka men qoǵamnyń suranysyna saı bolýǵa tıis ekenin aıtty.
