Prezıdent jastar men balalarǵa arnaıy úndeý joldady
ASTANA. KAZINFORM — 2026 jyly halqymyzdyń ıgiligi úshin jańa tabystarǵa jetý úshin tabandy eńbek etýimiz kerek. Bul týraly Memleket basshysy Qasym-Jomart Toqaev Qazaqstan halqyn Jańa jylmen quttyqtaý barysynda aıtty.
— Biz memlekettik mańyzy aıryqsha «Taza Qazaqstan» jobasyn bir qoǵam bolyp júzege asyra beremiz. Biz qalalarymyz ben aýyldarymyzdy taza, jasyl, jaıly jasaýymyz qajet. Bul Táýelsizdigimizdiń 35 jyldyǵynda elimizdiń damýyna eń jaqsy úleske aınalady. Biz osy tarıhı mejeni naqty ispen atap ótemiz. Bizdiń jetistikterimizdiń myzǵymas negizi — bul «birligimiz áralýandyqta» tujyrymdamasy rýhyndaǵy qoǵam turaqtylyǵy, kelisimi. Qazaqstannyń usynysymen Birikken Ulttar Uıymy 2026 jyldy eriktiler jyly dep jarııalady. Halyqaralyq eriktiler qozǵalysy tileýlestik, meıirimdilik syndy myzǵymas adamgershilik qundylyqtaryn pash etedi. Bul — bizdiń de halqymyzǵa tán asyl qasıetter, — dedi Qasym-Jomart Toqaev.
Prezıdenttiń paıymynsha, Jańa jyl mańyzdy ózgerister jyly bolmaq. Al onyń qanshalyqty tabysty bolatyny eń aldymen ózimizge baılanysty.
— Biz bárimiz tabandy eńbek etýimiz kerek, sonda ǵana elimiz zor tabystarǵa jetedi. Bul eń aldymen halqymyzǵa qajet. Biz 2026 jyly halqymyzdyń ıgiligi úshin jańa tabystarǵa jetý úshin tabandy eńbek etýimiz kerek, — dedi Memleket basshysy.
Qasym-Jomart Toqaev Jańa jyldy jumysta qarsy alǵan azamattardyń da bar ekenine toqtalyp, olardy arnaıy quttyqtady.
— Dál qazir Jańa jyldy jumysta qarsy alyp jatqan azamattarymyz bar. Bul — óz isine adaldyq pen qoǵam aldyndaǵy jaýapkershiliktiń jarqyn kórinisi. Men Sizderdiń tabandy eńbekterińizdi joǵary baǵalaımyn. Sizderge arnaıy quttyqtaýymdy joldaımyn. Elimizdi kórkeıtýge úles qosyp júrgen barsha azamatqa zor alǵys aıtamyn. Shyn máninde, týǵan elge qyzmet etýden artyq baqyt joq. Halqymyz «Yntymaq bar jerde — yrys bar» deıdi. Sondyqtan, berekeli birligimizdi saqtap, birtutas ult bolyp elimizdi damyta bereıik, — dedi Memleket basshysy.
Sondaı-aq Prezıdent jastar men balalarǵa arnaıy úndeý joldady.
— Búgin osy erekshe sátte jastar men balalarǵa úndeý joldaǵym keledi. Qazir — múldem jańa qubylystar jáne zor múmkindikter dáýiri. Árkim, eń aldymen, ózine, boıyndaǵy kúshi men qabiletine senýi kerek. Uly Abaıdyń «Ózińe sen, ózińdi alyp shyǵar, eńbegiń men aqylyń eki jaqtap» degen sózi árdaıym ózekti. Belsendi, bilimdi, eńbekqor, tártipti, ushqyr bolyńyzdar. Joldaryńyz ashyq bolsyn! Árqashan alar asýlaryńyz bıik bolsyn! Elimizdiń ár azamatyna zor densaýlyq, amandyq jáne tabys tileımin! Tórt qubylamyz túgel bolsyn! Ár shańyraq jaqsylyqqa tolsyn! Kók Týymyz máńgi jelbiresin! Otanymyz — Qazaqstan Respýblıkasy, Qazaq eli jasaı bersin! Jańa jyl qutty bolsyn! , — dedi Qasym-Jomart Toqaev.
Aıta keteıik, buǵan deıin Memleket basshysynyń Qazaqstan halqyn Jańa jylmen quttyqtaǵanyn habarlaǵan edik.