Prezıdent: Jasandy ıntellektini paıdalaný úshin tıisti zańnamalyq negiz qalyptastyrý — asa ózekti mindet
ASTANA. KAZINFORM — Memleket basshysy Qasym-Jomart Toqaev forýmnyń plenarlyq otyrysynda «Jasandy ıntellektini paıdalaný úshin tıisti zańnamalyq negiz qalyptastyrý — asa ózekti mindet» ekenin aıtty. Bul týraly Aqorda málim etti.
— Elimizdegi ulttyq kompanııalar, otandyq kásiporyndar osyndaı ınnovatsııalyq jobalardy belsendi túrde qoldanýy kerek, óıtkeni ozyq tehnologııa dáýirinde túbegeıli ózgeriske daıyn bolý óte mańyzdy. Onsyz damý bolmaıtyny anyq. Taǵy bir másele. Ozyq tehnologııalardy qoldaný, bir jaǵynan, paıdaly jáne tıimdi bolǵanymen, ekinshi jaǵynan, syn-qateri de az emes. Sondyqtan Jasandy ıntellektini paıdalaný úshin tıisti zańnamalyq negiz qalyptastyrý — asa ózekti mindet. Bul baǵytta biraz jumys isteldi, áli de istelip jatyr. Osy saladaǵy negizgi qujat — Tsıfrlyq kodeksti jedel qabyldaý úshin naqty sharalar jasalýda. Kodekste ekonomıka, bilim berý, densaýlyq saqtaý jáne memlekettik basqarý salalaryn jappaı tsıfrlandyrý júıesi aıqyndalady. Jalpy, Tsıfrlyq Kodeksti asyǵys qabyldaı salýǵa bolmaıdy, bul — shyn máninde jaýapty, kúrdeli jumys. Sol sebepti Parlamentte sarapshylardyń, quzyrly mekeme ókilderiniń qatysýymen jasandy ıntellektini damytý máselesi boıynsha arnaıy tyńdaýlar ótkizildi. Bir apta buryn Májilis «Jasandy ıntellekt týraly» Zańdy ekinshi oqylymda qabyldady. Rasynda, bul ýaqtyly qabyldanǵan zań boldy. Shetel mamandary da muny elimizdiń turaqty tsıfrlyq ekojúıesin qurý jolyndaǵy mańyzdy qadam dep baǵalap, jaqsy pikir aıtýda, — dedi Memleket basshysy.
Prezıdent sondaı-aq tsıfrlandyrý ultymyzdyń mentalıtetine oń áserin tıgizetinin aıtty.
— Men Joldaýda tsıfrlyq memleket qurý Qazaqstannyń keleshegin aıqyndaıtyn strategııalyq tańdaý ekenin aıttym. Úsh jyldyń ishinde tsıfrlyq basqarý formatyna tolyq ótý mindeti qoıyldy. Bul memlekettiń azamattarmen jáne bıznespen ózara qarym-qatynasyn túbegeıli ózgertedi. Osy maqsatta Jasandy ıntellekt jáne tsıfrlyq damý mınıstrligi quryldy. Jańa vedomstvo tsıfrlandyrýdyń jáne turmystyń barlyq salasyna jasandy ıntellektini engizýdiń basty lokomotıvi bolady. Basqasha aıtqanda, elimizdegi qoǵamdyq ómir múldem ózge sıpat alady. Tehnologııalyq turǵydan anaǵurlym zamanaýı bolady, ıaǵnı ultymyzdyń mentalıtetine oń áserin tıgizedi. Osylaısha, biz órkenıetke batyl qadam jasaımyz. Men halqymyzdyń keıinge qaıyrylyp, ótkenmen ómir súrmeı, keleshekke senimmen kóz tigýge tıis ekenin buǵan deıin birneshe ret aıtqan edim. Búgin maǵan «Samuryq-Qazyna» dırektorlar keńesiniń JI tehnologııasymen jumys isteıtin vırtýaldi múshesiniń qyzmetin kórsetti. Bul — ulttyq sýperkompıýter men Qazaqstandaǵy Alem LLM úlken tildik model bazasynda iske asyrylǵan Ortalyq Azııadaǵy alǵashqy joba. Іshki úderisterdiń bárin ońtaılandyrýǵa septigin tıgizetin mundaı sheshimniń mańyzy zor, — dedi ol.
Aıta keteıik, Astanada Digital Bridge 2025 halyqaralyq tehnologııalyq forýmy bastaldy.